Maamulka Trump oo tallaabo culus ugu hanjabay Israa’iil haddii aysan joojin…

[Deeq A.]

Washington (Caasimada Online) – Maamulka madaxweyne Donald Trump ee Mareykanka ayaa si adag u cadaadinaya Israel, isagoo uga digay in Maraykanku kala laabanayo taageerada muhiimka ah haddii Ra’iisul Wasaare Benjamin Netanyahu uusan joojin dagaalka Gaza, sida uu qoray wargeyska The Washington Post oo soo xiganaya ilo-wareed sir ah.

“Dadka Trump waxay Israel si cad ugu sheegayaan, ‘Haddii aadan joojin dagaalkan, waannu idinka tegi doonaa,’” ayuu yiri qof xog-ogaal ah oo codsaday in aan la magacaabin maadaama uusan haysan oggolaansho uu ku faahfaahiyo wadahadallada diblomaasiyadeed ee xasaasiga ah.

Sida la sheegay, cadaadiska Mareykanka ayaa sii kordhay maalmahan, xilli Israel ay dib u abaabulayso ciidamo keyd ah, isla markaana kordhisay duqeymaha cirka ee ka socda Gaza.

Xigashada ayaa sheegtay in Netanyahu uu intii lagu guda jiray shirkii golaha wasiirrada ee Axaddii, dib u bilaabista gargaarka bani’aadannimo ee Gaza ku tilmaamay arrin “farsamo oo kaliya,” isagoo saraakiisha u sheegay in aysan wax siyaasad ah ka dambeynin.

Inkasta oo uu haysto “aqlabiyad aad u ballaaran oo ka jirta Knesset-ka iyo guud ahaan bulshada Israel,” haddana ilaha xogta bixiyay ayaa sheegay in Netanyahu “uusan lahayn rabitaanka siyaasadeed ee lagu joojin karo dagaalka.”

Netanyahu ayaa Axaddii ku dhawaaqay in Israel ay damacsan tahay “adeegsiga awood ciidan oo baaxad leh si ay ula wareegto dhammaan Marinka Gaza,” isaga oo isla markaa oggolaaday dib u bilaabista gargaarka bani’aadannimo ee uu ku sifeeyay mid “yar oo xadidan.”

Wuxuu xusay in sawirro muujinaya macaluul baahsan ay noqon karaan “xadka cas ee diblomaasiyadeed” oo halis gelin kara taageerada istaraatijiyadeed ee Mareykanka.

Netanyahu ayaa sheegay in uu la hadlay “saaxiibbada ugu dhow Israel ee caalamka,” oo ay ku jiraan siyaasiyiin Maraykan ah oo uu ku tilmaamay “dad si aan leexleexad lahayn u taageerayay Israel muddo tobanaan sano ah.”

Sida uu sheegay, saaxiibbadaasi waxay ballanqaadeen in ay hub siiyaan Israel ayna difaacaan mowqifkeeda marka ay la timaado Golaha Ammaanka ee Qaramada Midoobay, balse waxay uga digeen “in aysan awoodin in ay wajahaan sawirro muujinaya dad macaluulsan.”

“Sababo la xiriira arrimo dhanka amniga iyo diblomaasiyadda ah, ma ogolaan karno in xaaladdu gaarto heer macaluul baahsan,” ayuu Netanyahu ku yiri muuqaal uu ku baahiyay baraha bulshada.

Warbixinta ayaa muujineysa xiisad sii xoogeysaneysa oo u dhexeysa maamulka Trump iyo dowladda Netanyahu, xilli Israel ay sii waddo dagaalka ba’an ee Gaza, halka caalamkana uu sare u kacayo walaaca laga qabo khasaaraha rayidka iyo burburka bani’aadannimo ee isa soo taraya.