Puntland oo qaaday tallaabo ay ku xoojineyso xiriirka Somaliland

[Deeq A.]

Garoowe (Caasimada Online) – Wasiirka arrimaha gudaha maamul-goboleedka Puntland ayaa qaaday tallaabo kale oo lagu xoojinayo xiriirka tooska ah ee ay dhowaan la yeesheen Somaliland, isaga oo difaacay iskaashiga cusub ee labada maamul.

Cabdi Faarax Saciid (Juxa) oo si faah-faahsan uga hadlay arrimaha soo kordhay ayaa qiray in Puntland iyo Somaliland uu muddo dheer soo jiray xiriirkooda, isla-markaana uu salka ku hayo iskaashi dhanka amniga oo labada dhinac ah, sida uu hadalka u dhigay.

Sidoo kale wuxuu intaasi ku daray in wadashaqeynta ay sii xoogeystay kadib markii la is dhaafsaday maxaabiis ay horay u kala qabsadeen labada dhinac, kuwaas oo hadda dib isku waydaarsaday, kadib heshiis hoose oo ay ka gaareen arrinta maxaabiista, kaas oo fulay.

Waxaa kale oo uu intaasi ku daray in hadda meesha ay ka baxeen xaalado ka taagnaa qaybo kamid ah Sool iyo Sanaag oo marar kala duwan ay ku wada dagaalameen labada maamul.

“Puntland iyo Somaliland waxay wadaagaan tabasho taariikheed, Dowladdii Kacaanka ayaa wax-wada yeeshay; markastana xidhiidhkeennu wuu jiray, haddana wuu socdaa; inkastoo caqabado ka jireen Sool & Sanaag; haddana waxa naga dhexeeya; deris, ganacsi, amni iyo iskaashi.” ayuu yiri wasiirka arrimaha gudaha maamulka Puntland.

Dhinaca kale wuxuu soo hadal qaaday arrinta SSC-Khaatumo, oo iyada loo aqoonsaday maamul-goboleed rasmi ah, wuxuuna sheegay in reer SSC ay xaq u leeyihiin inay go’aan ka gaaraan masiirka mustaqbalkooda.

Sidoo kale wuxuu hoosta ka xariiqay in shalay ay iyagu garteen inay wax ku darsadaan Puntland, maantana ay ku bixi karaan taladooda iyo go’aankooda.

“Khaatumo rabitaan kooda ayaan ku go’naa waana xaqooda; 1998 iyaga oo miyir-qaba ayey Puntland kamid noqdeen, haddana waxaa la rabaa talo in lagu kala tago ama lagu wada-joogo” ayuu mar kale yiri wasiir Cabdi Faarax Saciid oo loo yaqaanno (Juxa).

Hadalkan ayaa kusoo aadayo, iyada oo hadal xooggan uu ka dhashay xiriirka iskaashi ee u bilaabmay Somaliland iyo Puntland oo ah mud ugub ah, kuna soo aaday, xilli xasaasi ah oo ay jiraan isbeddallo ka dhacay gobollo waqooyi, kadib markii la aqoonsaday SSC.