Xogta qaab dhismeedka Xisbiga cusub ee Xasan Sheekh iyo is faham laga gaaray

[Deeq A.]

Muqdisho (Caasimada Online) – Caasimada Online ayaa heshay xogta qaab dhismeedka Hoggaanka Xisbiga Cadaaladda iyo Wadajirka JSP oo ay ku mideysan yihiin Madaxda DFS iyo dowlad Goboleedyada, kaas oo madaxweyne Xasan Sheekh uu musharax u yahay.

Wadatashiyadii ugu dambeeyay ayaa la isku afgartay qaab dhismeedka Xisbiga oo wax laga bedelay sidii markii hore la saadaalinayay inuu noqdo, waxaana qaab dhismeedkiisa laga dhigay:

1- Guddoomiyaha Xisbiga, ahna Musharax Madaxweynaha Xasan Sheekh Maxamuud

2- Guddoomiye ku xigeenka ee Xisbiga 1-aad Cabdicasiis Lafta Gareen

3- Guddoomiye ku xigeenka 2-aad Ra’iisul Wasaare Xamse

4- Xoghayaha Guud ee Xisbiga Cabdiraxmaan Odawaa

Madaxweynaha Koofur Galbeed Cabdicasiis Laftagareen oo markii hore dood ka keenay hannaanka qaab dhismeedka Xisbiga ayaa maalinta berri dib ugu soo laabanaya magaalada Muqdisho.

Markii uu yimaado waxaa la guda-gelayaa dhameystirka wadatashiyada ugu dambeyn maalinta Talaadada ah ayaa la qorsheynayaa la isla qaato inay dhacdo Xafladda shaacinta Xisbiga.

Haddii si rasmi ah loogu dhawaaqo isbaheysigan cusub ee ay ku mideysan yihiin Madaxda xubnaha Golaha Wadatashiga Qaran ayaa durba wuxuu u muuqan doonaa mid loo bedelay Xisbi.

Tijaabadan oo kale horay ayey dalka u soo martay, iyadoo hal Xisbi oo xubnaha sare ee dowlad oo idil sida Madaxweynaha, Ra’iisul Wasaare, Guddoomiye Baarlamaan, Xildhibaanada, saraakiisha dowladda oo dhan ku wada jiraan, xiligii dowladdii kacaanka.

Dad badan ayaa is waydiinaya sida uu Xisbigu ku soo socon karo, maadaama uu yahay isbahaysi isku danaysi ah oo dhinacyada ka mid ah ay muddo dheereysi iyo inay xukunka sii joogaan ka fikiraya.