Xogta kulanka maanta u furmaya Xasan iyo qaar ka mid ah madax goboleedyada

[Deeq A.]

Muqdisho (Caasimada Online) – Waxaa lagu wadaa in maanta uu magaalada Muqdisho ka furmo kulan u dhexeeya Madaxweynaha Soomaaliya, Xasan Sheekh Maxamuud, iyo qaar ka mid ah madaxda dowlad-goboleedyada.

Kulankan, oo ah mid wadatashi ah, waxaa ka qeyb galaya hoggaamiyeyaasha maamullada Galmudug, Koonfur Galbeed, iyo Hirshabeelle, halka aysan ka qeyb geli doonin Puntland iyo Jubbaland, kuwaas oo xiisad siyaasadeed xooggan kala dhaxeyso dowladda federaalka.

Madaxda maamulladan oo ku sugan magaalada Muqdisho ayaa la filayaa inay Madaxweyne Xasan Sheekh talo ka siiyaan gogosha uu ku baaqay, taas oo lagu doonayo in lagu xalliyo xiisadda siyaasadeed ee taagan iyo dagaalka lagula jiro kooxaha argagixisada.

Qabsoomidda kulankan waxaa shaaciyay La-taliyaha Arrimaha Dastuurka ee Madaxweynaha, oo sheegay in saacadihii la soo dhaafay uu Xasan Sheekh waday wada-tashiyo uu la yeelanayo madaxda siyaasadda dalka, kuwa xilalka hore u soo qabtay iyo hoggaamiyeyaasha dowlad-goboleedyada.

“Madaxweynaha wuxuu billaabay wada-tashiyo. Maanta wuxuu la kulmi doonaa madaxda dowlad-goboleedyada Koonfur Galbeed, Hirshabeelle, iyo Galmudug, wuxuuna kala hadli doonaa gogosha,” ayuu yiri La-taliye Xuseen Sheekh.

Kulankan waxaa la filayaa in ay ka soo baxaan talooyin ku saabsan gogosha uu madaxweynaha ku baaqay.

Madaxweynaha Soomaaliya, Xasan Sheekh Maxamuud, ayaa dhawaan ku dhawaaqay inuu fidinayo gogol wadatashi, xilli ay muddooyinkii dambe si weyn isku hayeen siyaasiyiinta mucaaradka oo ka biyo-diiddan hannaanka doorasho ee ay Villa Somalia u mareyso Baarlamaanka Soomaaliya.

Madaxdii hore ee dalka iyo siyaasiyiinta mucaaradka ayaa si niyad-sami leh u soo dhaweeyay gogosha uu fidiyay Madaxweyne Xasan Sheekh. Arrintan ayaa ku soo aadeysa xilli mucaaradka ay muddooyinkii dambe si adag u dhaliilayeen hoggaaminta Madaxweyne Xasan Sheekh.