Madaxweynaha Kuuriyada Koonfureed oo soo rogay xukun militari oo deg deg ah

[Deeq A.]

Washington (Caasimada Online) –Madaxweynaha Kuuriyada Koonfureed, Yoon Suk Yeol, ayaa si lama filaan ah ugu dhawaaqay xukun militeri oo degdeg ah in dalkaasi uu galay.

Madaxweynaha ayaa go’aankoisa sabab uga dhigay eedeyn uu u jeediyey xisbiga mucaaradka dalkaas ugu weyn oo sida uu sheegay cuuryaamiyay dowladda, ayna taageersan yihiin Kuuriyada Waqooyi, sida uu hadalkiisa u dhigay.

Madaxweynaha Kooriyada Koonfureed oo xukuma maamul laga tiro badan yahay ayaa waxaa culeys ka haystay in miisaaniyadiisa ay ansixiyaan xildhibaanada oo xukuumadiisa aan taageersaneyn.

Hadal uu ka jeediyay telefishinka dowladda ayuu madaxweynuhu ku eedeeyay xildhibaanada kalitalisnimo iyo in ay isku dayayaan in ay meesha ka saaraan dimuqraadiyada dalkiisa ui ku hoggaamiyo.

Madaxweyne Yoon, ma cadeyn waxa uu qorshahiisu yahay, balse wuxuu ballanqaaday in uu xaaladda caadi ku soo celinayo marka uu ka takhaluso wax uu ugu yeeray xoogga ka horjeeda dimuqraadiyadda.

Awoodda madaxweynaha ayaa aheyd mid liidata ilaa iyo markii ay dhacday doorashada guud ee dalkaas, taas oo mucaaradka ay ku guuleysteen.

Maamulka madaxweyne Joe Biden ayaa xiriir la sameeyay dowladda Kuuriyada Koonfureed, waxay si dhow ula socdaan xaaladda dalkaasi uu galay, sida uu warbaahinta u sheegay afhayeen u hadlay golaha ammaanka qaranka dalka Mareykanka.

Weli madaxweyne Joe Biden kama uisan hadlin xukunka militeri ee uu ku dhawaaqay dhiggiisa Kuuriyada Koonfureed Yoon Suk Yeol.