Kuxigeenka xoghayaha Qaramada Midoobay oo maanta kulan kula qaatay Muqdisho

[Jacaylbaro]

Kuxigeenka xoghayaha Qaramada Midoobay ayaa maanta kulan kula qaatay magaalada Muqdisho ra’iisul Wasaare Sharma’arke.

 

Sida uu Idaacada Shabelle u sheegay Afhayeenka Xukuumada KMG Soomaaliya C/qaadir Walaayo ayaa waxa uu tilmaamay in Wafdi ka socda Qaramada Midoobay oo uu hogaaminayo ku xigeenka Xoghayaha guud ee Qaramada Midoobay ay maanta Muqdisho kulan kula qaateen ra’iisul Wasaaraha dowladda KMG Soomaaliya.

 

C/qaadir Walaayo ayaa waxa uu sheegay in Qaramada Midoobay ay u balanqaadeen ra’iisul Wasaaraha dowladda KMG Soomaaliya in Xafiisyo ay ka furanayaan qaybo kamid ah dalka Soomaaliya kuwaasi oo uu sheegay in Qaramada Midoobay ay guddiyo u soo dirayso isagoo sidoo kalana tilmaamay in la is dhaafsaday qodobo kala gadisan.

 

Lama oga wax yaabaha sida rasmi ahaan kaga soo baxay kulankooda marka laga reebo qorshayaasha Qaramada Midoobay ee ku aadan in Xafiisyo ay ka furanayso gudaha dalka Soomaaliya kuwaasi oo aan si rasmi ah loo carabaabin halka ay ka furanayaan iyadoo sidoo kalana aan la shaacin wafdigan xilliga ay yimaadeen iyo waliba xilliga ay baxayaan.