Baarlamaanka SSC-khaatumo oo Maanta ansixiyay Miisaaniyadda 2024

[Deeq A.]

Guddoomiyaha Golaha Baarlamaanka Maamulka SSC-Khaatumo Mudane, Jaamac Yaasiin Warsame oo uu wehliyo guddoomiye ku xigeenka 2-aad Golaha Mudane, Jaamac Aadan Cismaan ayaa maanta shir guddoomiyay Kal-fadhi aan caadi ahyn ee iskugu yimaadeen Golaha Baarlamaanka Maamulka SSC-Khaatumo.

Fadhiga maanta oo uu  Ajendihiisu ahaa ka Doodista iyo Ansixinta Miisaaniyadda 2024.

Dood iyo falanqayn dheer kadib xildhibaanada Golaha Baarlamaanka ayaa cod gacan taag ah ku Ansixiyay Miisaaniyadda 2024 ee Maamulka SSC-Khaatumo Sida uu dhigayo Axdiga Maamulka SSC-Khaatumo qodobkiisa 11-aad faqradiisa 3-aad xarafka (C) iyo Xeer-hoosaadka Golaha Baarlamaanka qodobkiisa 2-aad faqradiisa 3-aad.

Guntanka fadhiga maanta oo ahaa (23) mudane waxaa u codeeyay oggol (19) mudane, diidmo(2) mudane, halka ay ka’ aamuseen (2) mudane.

Ugu damabayn shir guddoonka Golaha Baarlamaanka ayaa u mahad celiyay Wasiirka Maaliyadda Maamulka SSC-Khaatumo Mudane Cabdirashiid Maxamuud Maxamed (Xambuuse), Guddoomiyaha Guddiga Maaliyadda, Qorashaynta iyo Iskaashiga Caalamiga ah ee Golaha Baarlamaanka Mudane Axmed Keyse Cabdi Cali, xubnaha Guddiga Maaliyadda, Qorashaynta iyo Iskaashiga Caalamiga ah iyo dhammaan Xildhibaannada Golaha Baarlamaanka SSC-Khaatumo hawlihii adkaa aysoo qabteen.

PUNTLAND POST

The post Baarlamaanka SSC-khaatumo oo Maanta ansixiyay Miisaaniyadda 2024 appeared first on Puntland Post.