Raysal Wasaare ku-xigeenka Talyaaniga oo loo maxkamadeynayo muhaajiriin dartood

[Deeq A.]

Raysal Wasaare ku-xigeenka Talyaaniga Matteo Salvini ayaa sheegay inuu u dhaqaaqay inuu “difaaco” dalkiisa, xilli uu isku diyaarinayay inuu marqaati ka furo dacwad la xidhiidha go’aankii 2019-kii ee uu kaga horjoogsaday markab sida muhaajiriin ah inuu soo dejiyo.

Salvini oo madax ka ah xisbiga midigta fog ee Lega, islamarkaana saaxiib la ah xulufada Raysal wasaaraha iminka Giorgia Meloni, ayaa si xooggan u beeniyey eedaha ku saabsan xorriyad qaadista iyo ku takri-fal awoodeed oo la xidhiidha dhacdadii 2019, markaasi oo uu ka tirsanaa dowlad kale.

Waxaa tan iyo October 2021 lagu maxkamadeynayey magaalada Palermo ee gobolka Sicily, isaga oo ku eedeysan inuu xilkiisa waqtigaas ee wasiirka arrimaha gudaha u adeegsaday inuu 147 muhaajiriin ku xabiso badda, isaga oo diiday in markabka “Open Arms” ee gargaarka uu dejiyo.

Waxa uu wajahayaa ugu badnaan 15 sanno oo xabsi ah, haddii dambiga lagu helo.

Isaga oo shalay yimid maxkamadda, ayaa Salvini wuxuu baraha bulshada kusoo qoray inuu marqaati furi doona “aniga oo qabkaygu sarreeyo, kuna faraxsan wixii aan sameeyey.”

Waxa uu yidhi “waxaan difaacay amniga iyo xuduudaha dalkayga.”

Salvini oo ah siyaasi mayal adag oo lagu yaqaano siyaasaddiida “Marka hore Talyaaniga,” ayaa marar badan u isticmaalay weerarada ka dhanka ah muhaajiriinta sharci-darrada ah inuu ku xoojiyo taageeradiisa siyaasadeed.

Sannadii 2019, isaga oo ka tirsan dowladdiisa isbaheysiga ee Raysal wasaare Giuseppe Conte, ayuu fuliyey siyaasadda “dekado xidhan,” taasi oo Talyaanigu ku diiday inay dalka kusoo xidhaan maraakiibta sida muhaajiriinta badda laga soo badbaadiyo ee ka yimaada Afrika.

Salvini ayaa sheegay inuu ilaalinayey Talyaaniga markii uu hirgeliyey xeerkaas amni, oo uu ku sheegay tallaabo adag oo ka dhan ah dadka soo tahriibiya muhaajiriinta kasoo baxa Waqooyiga Afrika.

Salvini oo 50 jir ah ayaa sheegay in go’aanka lagu hor-istaagay markabka ay maamusho hay’adda Spain ee Open Arms ay isku raacday dowladda, oo uu jiro Conte.

Maxkamadeynta shalay ayaa ah markii ugu horreysay ee Salvini uu horyimaado maxkamadda, oo uu ku macneeyey mid siyaasad ay ka dambeyso.

Source