Saameynta duqeymaha cirka ee dagaalka Al-Shabaab iyo ‘kaalintooda howlgalka’

[Deeq A.]

Muqdisho (Caasimada Online) – Duqeymaha dhanka cirka ee inta badan fuliyaan waddamo ay kamid yihiin Mareykanka iyo Turkiga, kuwaasi oo qeyb ka ah dagaalka dowladda kula jirto kooxda Al-Shabaab ee ka socda dalka ayaa kaalin mug leh ka qaata howl-galka socda.

Duqeymaha dhinaca cirka ayaa 15 sano ee lasoo dhaafay waxay Mareykanka la beegsanayeen hoggaanka iyo xubnaha ugu sareeya kooxda Al-Shabaab. Xubnihii ugu caansanaa ee duqeymahaas lagu dilay waxaa kamid ahaa hoggaamiyihii Al-Shabaab Axmed Cabdi Godane.

Sidoo kale waxaa lagu dilay duqeymahaasi Aadan Xaashi Ceyrow oo ahaa taliye sare oo Al-Shabaab ah, tan iyo waagaasi waxaa dhacayay weeraro hadba xubno ka tirsan kooxda lala beegsanaayay.

Sidoo kale duqeymahani waxay hadda gacan ka geysanayaa dagaalka dowladda Soomaaliya kula jirto Al-Shabaab ee ka socda deegaanada Galgaduud iyo HirShabeelle.

Haddaba, muhiimad intee le’eg ayay kaalmada dhinaca weerarada cirka ah ee dowladda federaalka hesho u leedahay dagaalka Al-Shabaab?

Wasiirkii hore ee amniga Soomaaliya Cabdullaahi Maxamed Nuur oo la hadlay VOA ayaa sheegay in taageerada saaxiibada caalamiga ah ee dhanka hawada ay saameyn ballaaran ku leeyihiin dagaalka Al-Shabaab ka dhanka ah.

Cabdullaahi oo hadda ah La-taliyaha sare madaxweynaha ee arrimaha la-dagaalanka iyo ka hortaga fikirka xagjirka ah ee rabshadaha wata ayaa sidoo kale waxa uu sheegay in dagaal-yahaanada kooxda ay ka cabsadaan weerarada dhanka cirka ah, ayna awood u laheyn inay iska caabiyaan weerarada dhanka cirka ah oo iyagu qeyb ka ah howl-gallada ay wadaan ciidamada huwanta.

“Taageerada saaxiibada Soomaaliya ee dhanka hawada waxay ku leeyihiin saameyn aad ballaaran, marka aad fiiriiso kooxaha argagixisada dagaalada ay galaan waa noocyada ay ugu neceb yihiin dagaalka hawada,” ayuu yiri Cabdullaahi Maxamed Nuur.

“Marka aad fiiriso taariikhda waxaan xogagaal u nahay madax soo martay hoggaanka sare ee kooxda waxaa lagu bartilmaameedsaday duqeymo cirka ah oo iska kaashadeen saaxiibada Soomaaliya iyo hay’adaha amniga ee Soomaaliya.”

Sidoo kale waxa uu tilmaamay in kooxda cabsi badan ka qabto inay wajahaan duqeymaha cirka, ayna tahay halka ay weli ka jilicsan yihiin howl-gallada cirka ah oo aysan u babac dhigi karin.

“Baqdin aad u fara badan ayay ka qabaan, waxay ugu neceb yihiin ayna kari karina inay iska caabiyaan kaalmada cirka ah ee Soomaaliya ka hesho saaxiibada caalamka,” ayuu hadalkiisa sii raaciyay wasiirkii hore ee amniga Soomaaliya.

The post Saameynta duqeymaha cirka ee dagaalka Al-Shabaab iyo ‘kaalintooda howlgalka’ appeared first on Caasimada Online.