Daawo: Xamza iyo golihiisa wasiirada oo maanta tegay Heliwaa kadibna sheegay…

Deeq A. · July 30, 2023

364187925_677513464425948_76152142193402

Muqdisho (Caasimada Online) – Ra’iisul wasaaraha xukuumadda federaalka Soomaaliya, Xamza Cabdi Barre, qaar kamid ah golihiisa wasiirada, xildhibaano iyo mas’uuliyiinta maamulka gobolka ayaa maanta tegay degmada Heliwaa ee magaalada Muqdisho.

Mas’uuliyiintaan oo uu ugu horreeyo ra’iiisul wasaaraha ayaa halkaas u tegay ka qayb-galka kulan wecyi-gelin ah oo ay goobjoog ahaayeen maamulka iyo shacabka degmada Heliwaa.

Ra’iisul wasaare Xamza oo madasha ka hadlay ayaa aad u boggaadiyay reer Heliwaa, wuxuuna tilmaamay in tani ay muujineyso isbeddalka amniga ee ka jira caasimada.

Wuxuu sidoo kale ku dardaarmay inay la shaqeeyaan laamaha amniga iyo maamulkooda, ayna sidoo kale dhistaan xarunta degmada ee uu ku shaqeeyo guddoomiyaha.

Xamza Cabdi Barre ayaa sidoo kale sharraxay sida ay ku timid guusha weyn ee laga gaaray amniga Muqdisho, wuxuuna tilmaamay in markii la magacaabay uu u adkeysan waayay dhibaatada amni ee ka jirtay caasimada kadibna uu isugu yeeray masuuliyiinta dowladda.

“Aqalka dowladda hoose ayaan isugu imaanay waxaan goosanay in dadkeena ay sidaan kusii jirin karin, ayna suuragal aheyn, waxayna nala noqotay inay mas’uuliyad darro tahay, waxaana nala qaraaratay xafiisyada aan fadhino, kadib waxaa isla qaadanay in tallaabo la qaado magaaladan amnigeeda lagu sugaayo” ayuu yiri ra’iisul wasaare Xamza Cabdi Barre.

Sidoo kale wuxuu tilmaamay inay la yimaadeen midnimo iyo wada shaqeyn hay’adaha dowladda dhexdooda ah, si awoodda oo dhan hal meel la’isugu keeno.

“Furaha guusha waa midnimo, waa wada shaqeyn, waxaana isku xirnay hay’adaha amniga iyo gobolka Banaadir” ayuu hadalkiisa sii raaciyay.

Intaas kadib wuxuu shaaciyay inay dajiyeen qorshe cad oo lagu sugayo amniga caasimada, ayna diyaariyeen ciidamada Boolis Milataaro, kuwaas oo keenay isbedddalka maanta.

“Waxaan dajinay qorshe lagu sugayo amniga magaalada oo la yiraahdo qorshaha koowaad, qorshaha labaad iyo qorshaha saddexaad oo isbdaba socda, kadibna waxaan howlgelinay ciidamada aan u baahanahay, annagoo soo kordhinay boolis mliataaro” ayuu mar kale yiri.

Sidoo kale wixii kusii daray “Arrintaas waxaa keentay marka in magaaladii laga sifeeyo Khawaarijta waxay keentay in nabaddeeda lasoo celiyo, dhimashadiina ay yaraatay”