Afar arrin oo xasaasi ah oo ku gadaaman weerarkii Kulliyadda

[Deeq A.]

Muqdisho (Caasimada Online) – Ciidanka xoogga dalka ayaa Isniintii dorraad lumiyay dhalinyaro muhiim ah kadib markii qof naftii halige ah isku qarxiyay ciidan hal urur ah oo fayl ku jiray gudaha Kulliyadda Jaalle Siyaad ee wadada warshadaha ee magaalada Muqdisho.

Warar kala duwan ayaa kasoo baxaya tirada dhimashada ee ciidanka, wallow aanay dowladda weli sheegin tirada rasmiga ah ee ciidanka ku dhintay qaraxaas.

Qaraxu kama dhicin banaanka, ee waxa uu ka dhacay gudaha xarunta, gaar ahaan halkii ciidanka lagu faylinayay, taasi oo deg deg u dhalineysa su’aallo badan oo u baahan jawaabo la aqbali karo.

Waxaa jirta afar arrimood oo ku gadaaman weerarkaan, kuwaasi oo kala ah;

1. Baarista dhacdada

Waa adag tahay in qof aan la aqoonin uu si fudud gudaha ugu galo xarunta Jaalle Siyaad oo ah goob aad loo ilaaliyo. Qofka la sheegay inuu is qarxiyay ma gudaha ayuu kusii jiray? Ma lasoo daayay? Ma ciidanka ayuu ka tirsanaa? Sidee qofkan ku tegay halkii ciidanka safka uga jireen? Waa su’aasha ugu badan ee u baahan inay dowladda baaris deg deg ah ku sameyso oo ay umadda la wadaagto.

2. Tuhunka isku milanka

Horay waxaa u baahinay markii dowladda ay baaris ku sameysay isku milankii argagixisada iyo booliska in lagu faa’iiday oo baabuurtii qaraxyada ay soo geli waayeen gudaha magaalada Muqdisho, laakiin loo baahan yahay in ciidanka xoogga dhexdiisana turxaan bixin lagu sameeyo.

Dhacdadii Isniintii ee kuliyadda Jaalle Siyaad waxay qasbeysa inay dowladda deg deg u billowdo baaris ku aadan cilaaqaadka argagixisada ku leedahay gudaha ciidanka xoogga dalka.

Inay kooxda ogtahay xilliga ay askarta faylka ku jirto iyo inuu qofkani awood u yeesho inuu halkani yimaado waa arrin ku qabseysa dowladda inay casriyeyso mashruuceeda la dagaalanka isku milanka.

3. Qaraxyada jaakadaha oo xal deg-deg ah u baahan

Qaraxii Isniintii, midkii maqaayadda Pearl Peach ee Liido iyo midkii dhawaan lagu dilay guddoomiye ku-xigeenkii hore ee gobolka Shabeellaha Hoose iyo askar la socotay dhamaan waxaa fuliyay rag sitay jaakadaha qaraxyada.

Sida muuqata argagixisada halkaas ayay hadda u wareegtay, waxaana laamaha amniga ee dowladda Soomaaliya laga rabaa xal iyo qorshe gaar ah oo jaakadaha qaraxyada ku saabsan. Sidoo kalena goobaha ganacsiyada ee bulshada ku kulanto waa inay baaris gaar ah galiyaan dhamaan dadka jaakadaha sita ee imaanaya goobaha muhiimka ah.

4. Argagixisada oo xooggeeda iskugu geysay ciidanka milatariga

Sida muuqata Al-Shabaab waxay si gaar ah u bartilmaameedsaneysaa ciidanka xoogga dalka, oo sababay muddo sanad ah in dhul badan laga qabsado kooxda.

Dhowrkii weerar ee ugu dambeeyay oo ay kooxda u gaar yeeshay ciidanka xoogga dalka waxay milatariga fareysaa foojignaan, diyaar-garow iyo jawaab celin.

The post Afar arrin oo xasaasi ah oo ku gadaaman weerarkii Kulliyadda appeared first on Caasimada Online.