Saddex arrin oo muhiim ka dhigaya qorshaha socda ee Soomaaliya iyo Ruushka

[Deeq A.]

Muqdisho (Caasimada Online) – Dowladda Madaxweyne Xasan Sheekh Maxamuud ayaa si ficil ah u billowday soo celinta xiriirka Soomaaliya iyo Ruushka. Labadaan dal oo ay u dhaxeeyaan dhacdooyin taban iyo kuwa togan intaba, ayaa muddo laheyn cilaaqaad micno leh.

Wasiirka Arrimaha Dibedda ee Soomaaliya Abshir Huruuse ayaa tegay Ruushka bishii May ee sanadkaan, haddana waxaa socda qorshe lagu xoojinayo xiriirka labada dal.

Dad badan oo Soomaali ah ayaa su’aallo ka keenay waxa waqtigaan muhiim ka dhigaya xiriirka Soomaaliya iyo Ruushka, sidoo kalena waxaa la faafiyay warar sheegaya in labada dal ay heshiis milateri gaareen.

Laakiin wasiirka arrimaha dibedda ee Soomaaliya oo socdaalkiisa Moscow uga jawaabay guddiga arrimaha dibedda ee Soomaaliya ayaa beeniyay inay jiraan heshiisyo millateri oo ay gaareen Muqdisho iyo Moscow.

Ruushka waxa uu kamid yahay dalalka deynta ugu badan ku leh Soomaaliya, xilli dowladda federaalka ah ee Soomaaliya ay olole ugu jirto in laga cafiyo deyn 5 bilyan oo dollar ah oo lagu leeyahay dalka.

Si deyn cafintaasi loogu gun-gaaro dowladda Soomaaliya waxay ku qasban tahay inay saaxiibtinimo gaar ah u muujiso dalalka deynta ku leh.

Sidoo kale Soomaaliya waxaa saaran cuna-qabateyn dhanka hubka ah, xilli adduunka uu sugayo in dowladda federaalka ah ee Soomaaliya ay ka adkaato argagixisada.

Madaxweyne Xasan Sheekh Maxamuud waxa uu waayahan waday olole xooggan oo la xiriira dhanka cuna-qabateynta hubka, Ruushka-na waxay kamid yihiin shanta dal ee awoodda ugu badan ku leh Golaha Ammaanka, wax badan ayayna ka galaan ololaha ay Soomaaliya ugu jirto in laga qaado xayiraadda dhanka hubka.

Iyada oo dhinaca kale la iloobi karin deeqaha waxbarashada ee ay marwalba Ruushka siiyaan dhalinyarada Soomaaliyeed, haddana wasiirka arrimaha dibedda ee Soomaaliya Abshir Huruuse waxa uu ku dhiiraday inuu caddeeyo waxa ay Raashiya muhiim ugu tahay maanta.

“Ruushka waa waddan aan laheyn xiriir weyn oo hore, inkasta oo sanadahaan dambe active aheyn, ardeyna ay naga joogto oo sanad walba ina siiya deeqo waxbarasho. Waa waddan kamid ah waddamada deynta ugu badan inagu leh ee aan kala xaajooneyno deyn cafinta, waana waddan muhiimad u leh in nagala qaado cunaqabateynta hubka,” ayuu yiri Wasiir Huruuse.

Waxa uu intaas sii raaciyay “Sidaas aawadeed maadaama ay ina-soo casuumeen in aan u tagno waanu ajiibnay. Ma jirto heshiis aan galnay oo ah heshiis ciidan ama ganacsi ama mid kaleba.”

The post Saddex arrin oo muhiim ka dhigaya qorshaha socda ee Soomaaliya iyo Ruushka appeared first on Caasimada Online.