Xog: Xamza oo ka fakaraya inuu eryo WASIIR sameeyey arrin fadeexad culus dhalisay

[Deeq A.]

Muqdisho (Caasimada Online) – Ra’iisul wasaaraha Soomaaliya Xamza Cabdi Barre ayaa ka fakaraya tallaabo ka dhan ah wasiirka ganacsiga Soomaaliya Jabriil Cabdirashiid oo hadal uu dhowaan jeediyey fadeexeeyey dowladda federaalka. 

Xilli madaxweyne Xasa Sheekh iyo Xamza Cabdi Barre ay wadaan dagaal ka dhan ah musuq-maasuqa, si loo dhiso magaca iyo sumcadda dowladda, ayuu wasiir Jabriil guddi baarlaman ka hor sheegay in dadka ugu horreeya ee uu shaqaaleysiinayo ay yihiin ehelkiisa. 

“Shaqaalaha dowladda Soomaaliya ee 4.5 lagu saleeyay, mab’da aad qabtid ee ah walaashaa iyo walaalkaa ama nin kugu qaraabada ayaa qortay ma qabi, haddaa ku sheegaa ninka u sokeeya ee aan wax siinayo waa ninka qaraabadeyda hadda u heli karo meel, waxaa rabaa in si saraaxa iskaga hadlo,” ayuu yiri wasiir Jabriil Cabdirashiid.

Hadalkan ayaa hadal hayn badan ka dhex-abuuray baraha bulshada Soomaalida, wuxuuna banaanka keenay nidaamka eexda ku dhisan ee shaqaalaha dowladda lagu qoro. 

Arrinta yaabka leh ayaa ah in wasiirka uusan been sheegin, balse uu si shaacsan u sheegay arrin la wada ogyahay oo dhammaan wasiirada iyo madaxda dowladda ay sameeyaan, oo ah in dadka ehelka la ah ay shaqo siiyaan, ayaga oo aan ku xulan karti iyo aqoon.

Si kastaba, hadalkan ayaa la sheegay inuu ka caraysiiyey ra’iisul wasaare Xamza aadna uga xumaaday, waxaana ilo-wareedyo ka tirsan xafiiskiisa ay Caasimada Online u sheegeen inuu ra’iisul wasaaraha ka fakarayo inuu xilka ka qaado wasiirka.

“Ra’iisul wasaaraha wuu ka carooday hadalkaas, wuxuuna doonayaa inuu wada-hadal la yeesho wasiirka, waxaana suurta-gal ah in xilka laga qaado,” ayuu yiri ilo-wareed ka tirsan xafiiska Xamza.

Dhinaca kale, wasiir Jabriil Cabdirashiid, oo shalay shir jaraa’id qabtay, ayaa raali gelin iyo faahfaahin dheeraad ah ka bixiyey hadalkii fadeexadda dhaliyey.

Wuxuu sharxay hanaanka loo maray shaqaale 10 qof ahaa oo laga ruqseeyey hey’adda Tayodhowrka oo hoos tagta wasaaradda ganacsiga iyo sida lagu qoray 10 qof oo kale oo boosaskaas loo qaatay.

“Shalay waxaa la ii fahmay in 10-ka qof aan bedelay oo dadkeyga aan ku bedelay, sidaas uma shaqeyno guud ahaan dadka Soomaaliyeed ayaan wasiir u ahay, hal qof kuma lihi dadka la igu heysto,” ayuu yiri wasiir Jabriil.

Sidoo kale wasiirka ayaa cadeeyey inuu ogolyahay in lasoo wareysto shaqaalaha. “Warbaahinta waan ku marti qaadi karaa, si loo wareysto haddii ay jiraan shaqaale tabasho naga qaba,” ayuu hadalkiisa ku sii daray.

The post Xog: Xamza oo ka fakaraya inuu eryo WASIIR sameeyey arrin fadeexad culus dhalisay appeared first on Caasimada Online.