Dowladda Sweden oo Loo Ogolaaday Ku Biirista Ururka Gaashaanbuurta NATO iyo Turkiga oo Aqbalay

[Deeq A.]

Dowladda Sweden ayaa waxaa loo ogolaaday in ay xubin ka noqoto Ururka Gaashaanbuurta NATO, iyadoo muddo dadaal ugu jirtay sidii ay u heli laheyd xubinnimada Ururka, walow ay jirtay diidmo ay ka muujinaysay dowladda Turkiga, wararka ayaa sheegaya in ugu dambeyn uu aqbalay.

Xoghayaha Guud ee NATO Jens Stoltensberg ayaa sheegay Isniintii in madaxweynaha dalka Turkiga Recep Tayyip Erdogan uu ogoladay inuu “sida ugu dhakhsaha badan” ugu gudbiyo golaha baarlamaanka ee dalkiisa xubinimada Sweden ee NATO, isaga oo sheegay inuu ka shaqayn doono, in golaha baarlamaanku meelmariyo codsigaas.

Xoghayaha NATO ayaa hadalkan sheegay, ka dib kulan uu la qaatay madaxweyne Erdogan iyo ra’iisal wasaaraha Sweden, ka hor kulanka isbahaysiga NATO uu ku yeelanayo Lithuania, Turkiga ayaa Sweden codkiisa diidmada ah u dul dhigay kadib markii uu sheegay in aysan awoodin bixinta dhaqaalaha ururka.

“Tani waa maalin taariikhi ah, sababtoo ah waxaa helnay ballan-qaadka Turkiga ee ah, inuu ka shaqeeyo ansixinta xubinimada Sweden ee NATO, isaga oo sheegay inuu ka shaqaynayo sidii golaha baarlamaanku u ansixin lahaa arrintan” ayuu yidhi Stoltenberg.

Go’aankan lama filaanka ah ee uu ku dhawaaqay xoghayaha NATO ayaa jidka u xaadhaya in Sweden ay noqoto dalka 32aad ee ku biira isbahaysiga NATO, waxaana ay qeyb ka noqon doontaa dalal qeybta ah ah Ururkaan oo la aasaasay  April 4, sanadkii 1949, kadib dhammaadkii dagaalkii labaad ee Adduunka.

Sikastaba ha ahaatee ku biirista NATO ee dowladda Sweden ayaa waxaa ay u gogolxaareysaa sidoo damaca dalka Ukrine ee ku aadan ku biirista ururkaan, walow dowladda Mareykanku ay ka cagajiidayso arruntaan, laakiin Ukraine ayaa taageero ka heleyso dalka turkiga gaar ahaan madaxweyne Erdogan.

Goobjoog News

Source: goobjoog.com