Daawo: Shariif oo war kasoo saaray xiisadda dagaal ee beelaha Abgaal iyo Xawaadle

[Deeq A.]

Muqdisho (Caasimada Online) – Madaxweynihii hore ee Soomaaliya Shariif Sheekh Axmed ayaa markii u horeysay ka hadlay xiisadda dagaal ee u dhaxeysa beelaha Abgaal iyo Xawaadle ee ka taagan gobolka Hiiraan.

Shariif oo barbar taagan yahay Ergeyga gaarka ah ee madaxweynaha u qaabilsan Xasillinta iyo Ilaalinta Arrimaha Rayidka ee goobaha dagaallada Maxamed Cabdi Waare ayaa shir jaraa’id oo uu ku qabtay magaalada Muqdisho wax aan la aqbali karin ku sheegay in dagaalka Al-Shabaab laga ag furo dagaallo kale oo macno darro ah.

“Dagaal nagula farad yeelay oo aan ka baaqsan karin ayaa nagu furan oo waa dagaalka Al-Shabaab. Mid kuwa meesha jooga iyo kuwa kale aan kala kaseyn oo in uu ku dilo kaliya loo soo diyaariyay oo waxba ku weydiineyn kaas ayaa jooga.”

“Hadda rag tahay oo tabar haysid xagga aad oo kaas wax ka qabo. Dalkaan waxaa la rabaa inuu istaago dhiigga bilaashka ku daadanaya, oo uu ku istaago hab nabadeed oo waxgaradnimo ah, hab dowladnimo iyo mid maamul uu ku istaago ayaa la rabaa.”

Madaxweynihii hore ee dalka ayaa waxa uu taageeray dadaallo uu sheegay in madaxweynaha maamulka HirShabeelle Cali Guudlaawe uu wado, kuwaasi oo xal loogu raadinayo xiisadda dagaal ee u dhaxeysay beelaha Abgaal iyo Xawaadle.

Shariif ayaa waxa uu ku baaqay in miiska wada-hadalka lagu xaliyo wixii la isku hayo, oo aan loo marin dhiig la daadiyo, xilli uu dalka ka socdo dagaal ka dhanka ah kooxda Al-Shabaab.

“HirShabeelle baryahan khilaafyo iyo culeyso ayaa ka jira waxaa rabnaa in howsha dhulka la dhigo ayaa rabna oo la wada-hadlo, maamul sidiisaba haddii cilad timaado fadhi iyo wada tashi ayaa lagu turxaan bixiyaa,” ayuu yiri Shariif Sheekh Axmed.

“Madaxweyne Cali Guudlaawe wafdi ayuu diray waa tallaabadii habooneyd taas ha laga warsugo taas ayaa xoojineyna anaga,” ayuu yiri Shariif oo sheegay garab taagan yihiin dadaallada uu Guudlaawe xal ugu raadinayo xiisadda taagan.

Shariif ayaa ugu dambeyntiina waxa uu ku baaqay in la joojiyo dhiigga sida macno darada ku daadanaya, islamarkaana loo wada jiheysto dagaalka Al-Shabaab, xilli magaalooyin kamid dalka ay ka dhaceen dagaal uu ku daatay dhiig.

“Maanta dadka Soomaaliyeed meel ay joogaan baahi uma qabaan dagaal iyo dhiig daata, waxay u baahan yihiin nabad iyo nolol fiican ay helaan oo sharafkooda uu soo noqdo. Dalkaan waa naga badan yahay kheyraadka ku jira naga badan.”

Deegaanka ay hadda xiisadaasi ka taagan tahay ayaa waxaa lagu magacaabaa Xalfooley, wuxuuna dhacaa xuduuda labada gobol, Xalfooley ayaa ka tirsan Shabeellada Dhexe.

Hadalka Shariif ayaa imanaya xilli qaar kamid ah waxgaradka beesha Abgaal ee degta xuduuda ay wadaagaan gobollada Hiiraan iyo Shabeellada Dhexe ay soo saareen digniin ku socota beesha Xawaadle.

Odayaal u hadlay beesha Abgaal oo shir jaraa’id ku qabtay Muqdisho ayaa sheegay in beesha Xawaadle ay xuduuda labada gobol ka bilowday dhul balaarsi cusub.

Sidoo kale odayaashaan waxay sheegeen in xaaladda ka taagan xuduuda labada gobol ay qarka u saaran tahay gacan ka hadal, iyagoo balan-qaaday in nabad darrada aysan ka bilaaba doonin Abgaal, balse ay ka baqayaan in walaalahood Xawaadle uu bilaabo.

“Walaalayaal dib u sikada waa taqaaniin degaankiina, Abgaal dhulkiisana waa taqaaniin, ma ogolin in dhulkeena aad baraago iyo baco ka qodotaan ama tuulo cusub ka aasaastaan,” ayuu yiri mid ka mid ah odayaashii hadlay ee beesha Abgaal Cismaan.

Xiisadaan cusub ayaa timid xilli xaaladda gobolka Hiiraan ay qasan tahay oo maamulkii uu khilaaf culus ka dhex taagan yahay, sidoo kale dhulka uu murankaani ka taagan yahay waxaa dhawaan laga xoreeyey kooxda Al-Shabaab.

Hoos ka daawo muuqaalka

The post Daawo: Shariif oo war kasoo saaray xiisadda dagaal ee beelaha Abgaal iyo Xawaadle appeared first on Caasimada Online.