Wasaaradda Amniga oo 3 qodob kasoo saartay arrinta agaasimaha Hay’ada Socdaalka

[Deeq A.]

Muqdisho (Caasimada Online) – Wasaaradda Amniga Gudaha ee XFS ayaa soo saartay qoraal ay ku beenisay in Agaasimaha Hay’adda Socdaalka iyo Jinsiyadda Cabdulqaadir Cilmi Cali (Cabdul) uu dalka ka baxsaday.

Wasaaradda ayaa qoraalkaan ku soo koobtay seddax qodob oo kala ah:

1 – In Agaasime Cabdul uu ku maqan yahay safar dalka dibadiisa ah oo wasaaraddu ay ka war-qabto.

2 – In wax is bedel maamul ah uusan ka jirin Hey’adda Socdaalka iyo Jinsiyadda Soomaaliya.

3 – Iyo in shaqada Hey’adda Socdaalka iyo Jinsiyadda ay si caadi ah ku socoto.

In kastoo wasaaradda amniga ay qoraalkaan ku sheegtay in Agaasime Cabdul uu safar uga maqan yahay dalka, hadana waxaa howshaan ku howlan oo baaritaankan wada hay’ado kale, taas oo suurtagal ka dhigeysa warka baxsashada Cabdul.

Xog maanta soo baxday ayaa sheegaysay inuu dalka ka baxsaday Agaasime Cabdul, kadib markii kamid noqday madax lagu soo eedeyay kiis musuq-maasuq ah.

Cabdul ayaa waxaa haatan baaris ku hayay hay’ado ka tirsan dowladda oo loo xil-saaray baaritaanada musuq maasuq ee masuuliyiinta qaar ay ku kacayaan, waxaana kamid ah xafiiska Hantidhawrka Qaranka oo cadeeyey in hey’adda Socdaalka ay ku jirto hey’adaha uu baaritaanku ku socdo.

Warka ku saabsan baxsashada Agaasimaha Hay’adda Socdaalka iyo Jinsiyadda ayaa soo baxay xalay, ayada oo baraha bulshada si weyn loogu faafiyay, maadaama uu ninkan ka mid yahay agaasimeyaasha saameynta leh ee ka tirsan dowladda federaalka Soomaaliya.

Horay waxaa Muqdisho uga baxsaday Agaasimihii Canshuurta Berriga ee Wasaaradda Maaliyadda Soomaaliya Muxiyadiin Xasan Jurus (Muxudiin Saabey), kaas oo gaaray deegaan hoos taga degmada Aadan-Yabaal ee gobolka Sh/Dhexe.

Saabey ayaa baxsaday kadib markii uu ka war helay qorshe la sheegay in lagu soo xiri lahaa, maadaama uu kamid noqday ragga loo soo jeedeeyay inay ku kaceen musuq-maasuq, balse aan la soo bandhigin cadeymo rasmi ah.

Hoos ka eeg qoraalka wasaaradda amniga

The post Wasaaradda Amniga oo 3 qodob kasoo saartay arrinta agaasimaha Hay’ada Socdaalka appeared first on Caasimada Online.