SOMALILAND oo war culus kasoo saartay go’aankii Golaha Ammaanka QM

[Deeq A.]

Hargeysa (Caasimada Online) – Xukuumadda Somaliland ayaa jawaab kasoo saartay bayaankii kasoo baxay Golaha Ammaanka ee Qaramada Midoobay, kaasi oo si kulul looga hadlay dagaalka weli ka socda magaalada Laascaanood.

Somaliland ayaa ugu horeyn waxay soo dhaweysay bayaankii ka soo baxay Golaha Ammaanka ee Qaramada Midoobay ee ku saabsanaa joojinta colaadda Laascaanood iyo abuurista xaaladaha nabadda ee magaaladaasi.

War-saxaafadeed kasoo baxay Wasaaradda Arrimaha Dibadda Somaliland ayaa waxaa lagu sheegay in Golaha Ammaanka QM u muuqday mid looga been sheegay xaaladda dhabta ah ee ka taagan Laascaanood, ayna ciidankeedu ka baxeen Laascaanood 26-kii Febraayo ee sanadkaan.

Somaliland ayaa sheegtay in markaas wixii ka dambeeyay ay ciidankeedu difaac adag ka galeen meel ka baxsan magaalada Laascaanood, islamarkaana ay si adag uga hortageen in ay waxyeelo soo gaadho dadka rayidka ah, iyada oo marar badan ay kooxo maleeshiyad ahi soo weerareen.

“Xukuumadda Somaliland ayaa waxay ka walaacsan taha6 go’aankii Golaha Ammaanku soo saaray oo fursad u ah in kooxda Al-Shabaab ay si xawli ah isugu balaadhiyaan magaalada Laascaanood iyo gobolka Sool ee Somaliland,” ayaa lagu yiri qoraalka kasoo baxay Somaliland.

Sidoo kale waxaa lagu sheegay qoraalka in arrintani aanay khatar ku ahayn oo keliya Somaliland, balse waddamada jaarka iyo gobolkaba, sidaas darteed ay tahay goluhu inuu udhug yeesho arrinkaan.

“Ma jirto dowlad keli ah oo xakamayn karta khatartan, sidaas darteed dowladda Somaliland waxay ka codsanaysaa xubnaha golaha ammaanka ee Qaramada Midoobay inay fiiro gaar ah siiyaan oo ay gacan ka geystaan ​​sidii ay khatartan isa soo taraysa looga hortagi lahaa.”

Somaliland ayaa waxay sheegtay in warqad u dirtay Xoghayaha Guud ee Qaramada Midoobay, taasi oo ku taariikhaysnayd 12-kii bishii April 2023, islamarkaana lagu ogaysiiyay khatarta Al-Shabaab ee ku soo korodhay magaaladda Laascaanood iyo gobolka Sool.

Qoraalka ayaa sidoo kale lagu sheegay in Somaliland ay wada-hadal ku baaqaysay tan iyo markii ay bilaabantay colaadu lakiin garaadadu ay aqbali waayeen iyo inay bixisay jid gargaar oo aan carqalad lahayn, ayna xukuumaddu gargaar cunto, biyo iyo adeeg caafimaad leh gaarsiisay deegaanada ay dadku ku barakaceen.

Waxay sheegtay in ciidamada Somaliland ee Sool ay difaacayaan madax-bannaanida dhuleed ee Somaliland iyo xuduudaheedii la aqoonsaday markii ay madax-bannaanida qaadatay, islamarkaana ay xuduudaha Somaliland waafaqsan yihiin qodobka 4-aad ee sharciga dhulka Afrika ee QM ay aqoonsan tahay.

“Caqabadda ugu weyn ee nabadda iyo xasiloonida magaalada Laascaanood hortaagan waa soo gelitaanka magaaladaas ee ciidamo maleeshiyaad ah oo ka soo jeeda maamul-goboleedka Puntland ee Soomaaliya oo iyagu si firfircoon u hurinaya colaadda ka taagan, waxa kale oo in dagaal-yahano ka tirsan kooxda Al-Shabaab ay sidoo kale qaab qabiil u adeegsadaan dhaq-dhaqaaqyada ay ka wadaan Laascaanood.”

Ugu dambeyntiina waxaa lagu sheegay war-saxaafadeedka Somaliland in sida kaliya ee lagu xalin karo colaadda Laascaanood ay tahay inay ka baxaan magaaladaasi ciidamada Puntland, ayada oo Golaha Ammaanka ee QM ku boorisay inay taageeraan bilowga dadaallada nabadeed.

The post SOMALILAND oo war culus kasoo saartay go’aankii Golaha Ammaanka QM appeared first on Caasimada Online.