Aqriso: Safiirka Mareykanka Larry André oo farriin cajiib ah uga tegay Soomaalida

[Deeq A.]

Muqdisho (Caasimada Online) – Safiirka shaqada kasii dagaya ee Mareykanka u qaabilsna arrimaha Soomaaliya, Larry André Jr ayaa qormo cajiib ah ku maca-salaameeyay Soomaaliya oo muddo ka shaqeynayay.

Larry ayaa qormadiisan cinwaan uga dhigay “Mahadsanid Soomaaliya” wuxuuna ku aamanay Soomaalida dib usoo kabashada iyo horumarka ay sameynayaan, isaga oo si gaar ah u bogaadiyay cidankeenna geesinimada ay muujiyeen iyo sida ay u xoreeyeen bulshooyinkooda.

“Dagaalka harsan, iyadoo la adeegsanayo tababaro iyo qalabayn, Mareykanku wuxuu sii wadi doonaa taageerada uu siinaayo dowladda Soomaaliya iyo ciidamada ammaanka si loo ballaariyo madax-bannaanida Soomaaliya lana gaarsiiyo dhammaan dhulkeeda oo dhan.”

Amb. Larry ayaa sidoo kale waxa ka dhawaajiyay inuu ku rejo weyn yahay mustaqbalka Soomaaliya, uuna ixtiraam buuxda u hayo horumarka dadkeedu gaareen, isaga oo ka codsaday madaxda siyaasadda Soomaaliya inay sii wadaan inay dalkan horumariyaan.

Hoos ka aqriso qormadiisa oo dhameystiran;

Mahadsanid Soomaaliya

Waxaa qoray Danjire Larry André, Jr.

Diblomaasiyiinta Soomaaliya jooga – run ahaantii dunida dacaladeeda – waxa ku habboonaan lahayd inay raacaan taladii Abwaankii weynaa ee Soomaaliyeed Hadraawi u ku tiriyey gabaygii Sirta Nolosha:

Hadalkana sar weedhiisa
Una saaf qofkii waaya
Ha ka tegin sarbeebtiisa
Hana gelin sursuur oodan
Hana lumin sargoyntiisa
Hana liqin sangaabtiisa
Ha ku saxan badheedhkiisa
Runta sogordoh haw yeelin
Ha suldaarin dooddiisa
Sisibaa wadaaggiisa
Sababee abbaartaada
Hana badin su’aashiisa
Sarrifkiyo tilmaantiisa
Saddex erey halkii dooni
Soddon yaanay kaa qaadan
Siddi-qabaxi yay raacin
Sare haw dhig-dhigin luuqda
Gacantana ha saydh-saydhin
Hana odhan wax sawliila

Anigoo raacaya tusaalaha Ustaadka hadalka, ereyada aan oron lahaa waa “Mahadsanid, Soomaaliya.”

Waad ku mahadsantihiin wada shaqaynta wacan. Suuqyadii faaruqsanaa ayaa dib u soo noolaaday. Dugsiyadii ayaa dib loo furay.

Wadooyin maritaankooda halis ahaa ayaa hadda u banaan ganacsi, sahleyna safaradda qoysaska dib ugu midoobeen. Iskaashigeena amni wuxuu sahley bulshooyinkii dulmanaa ee baadda iyo xagjirnimada inay ku noolaadaan nabad oo ay bilaabaan inay dib u dhisaan horumarkooda.

Waxaa aad ii dhiiri galisay geesinimada ay muujiyeen ciidamada iyo dukaanleyda sida ay u xoreeyeen bulshoyiinkooda. Dagaalka harsan, iyadoo la adeegsanayo tababaro iyo qalabayn, Maraykanku wuxuu sii wadi doonaa taageerada uu siinaayo dawladda Soomaaliya iyo ciidamada ammaanka si loo ballaariyo madaxbannaanida Soomaaliya lana gaarsiiyo dhammaan dhulkeeda oo dhan.

Waad ku mahadsantihiin tusaalaha wanaagsan. Intii aan safiirka ahaa, waxaan fursad u helay in aan la hadlo Soomaalida ku nool Hargeysa ilaa Kismaayo iyo meelo badan oo Soomaaliya ka mid ah. Iyadoo wada sheekeysiga qaar uu ahaa mid aad u adag, ayaa intooda badan waxa ay igu beertay in aan ku farxey sida ay Soomaalidu heer kasta oo ay tahay bulshada uga go’an tahay in ay si buuxda u soo nooleeyaan dalkooda.

Waxaan ka fikiraa aabaha reer Hiiraan oo ii sheegay in wiilkiisa askariga ah uu jecel yahay Soomaaliya iyo dadkeeda iyo rabitaankiisa inuu u dhinto. Mid ka mid ah madaxda bulshada magaalada Baydhabo ayaa iiga waramay sida ay ugu dadaalayaan hay’adaha samafalka inay diiwaan geliyaan ragga, haweenka, iyo qoysaska si loogu ogolaado inay helaan gargaar aad loogu baahan yahay inta lagu guda jiray abaarta.

Ardaydii yarayd ee reer Muqdisho ayaa dhoolla caddaynaysay mar ay ka sheekaynaysay wax-akhris, waxaanay ku haminaysa inay macallimad noqoto. Kuwani waa sheekooyinka dhirigelineyso dib u soo noolaynta buuxda ee Soomaaliya.

Tani waa sababta Maraykanku ugu rajo wayne yahay Soomaaliya midaysan, xoog badan, oo dimuqraadi ah, sababta aan u ahaanayno saaxiib la isku halayn karo oo dhinaca amniga ah iyo samatabbixinta bini’aadantinimo ee ugu weyn.

$1.3 bilyan oo gargaar ah oo ka timid Mareykanka – in ka badan 70 boqolkiiba dhammaan deeqaha bini’aadantinimada – waxay ka hortagtay macaluul waxayna joojisay gaajo. Biyo nadiif ah oo la cabbo iyo daryeel caafimaad oo degdeg ah oo ay bixisey dowlada Maraykanka ayaa ka hortagay in uu dillaaco daacuunka iyo jadeecada.

Si ay Soomaaliya u dhisato dal midaysan, adag, oo dimuqraadi ah, waxay u baahan tahay dhammaan dadkeeda.

Waad ku mahadsantihiin rabitaankiina. Markii aan imid bishii Janaayo ee sannadkii lasoo dhaafay, waxaa jiray qaar ku hanjabay in Soomaaliya ay dib ugu laaban doonto rabshadihii iyo sharci-darrada 1990-meeyadii. Waxaa jiray kuwo kale oo rabay in Soomaaliya hore u socoto.

Muuqaaladaasi waxa ay xasuusin weyn u ahaayen in guulihii aynu ka gaarno goobaha dagaalka, suuqyada iyo fasalada ay si degdeg ah u baabi’in karaan hagardaamooyin siyaasadeed oo aragti gaaban iyo dano gaar leh. Waxaan ka codsanayaa madaxda siyaasadda Soomaaliya inay sii wadaan inay dalkan horumariyaan.

Waxaa ni eegaya in ka badan 100,000 oo arday oo dib ugu soo laabtay iskuullada iskaashiga ka dhexeeya wasaaradda waxbarashada iyo USAID. Waxaa ni eegaya 8,000 ee beeralayda ah ee ku xiran suuqyada oo ka faa’ideysta qalabaytan farsamooyinka waraabka beeraha ee la wanaajiyay oo ay maalgelisay dowlada Maraykanka.

Waxaan markii ugu horreysay booqday Soomaaliya 2001, 22 sano kaddib, waxaan ku rajo weynahay mustaqbalka Soomaaliya, waxaana ixtiraam buuxda u hayaa hormarka dadka Soomaaliyeed gaareen.

Saaxiibtinimadeyda iyo dadka Soomaaliyeed way sii jiri doontaa inta noloshayda ka dhiman. Mahadsanid, is arag dhambe Soomaaliya.

Safiirka Maraykanka Larry André

Larry André waxa uu ahaa Safiirka Mareykanka ee Jamhuuriyadda Federaalka Soomaaliya laga soo bilaabo Janaayo 2022 ilaa May 2023.

The post Aqriso: Safiirka Mareykanka Larry André oo farriin cajiib ah uga tegay Soomaalida appeared first on Caasimada Online.