Golaha Wadatashiga Qaran oo ka heshiiyay ‘marxaladda ka dambeysa’ deyn cafinta

[Deeq A.]

Muqdisho (Caasimada Online) – Shirkii Golaha Wadatashiga Qaran ee habeen hore magaalada Muqdisho lagu soo geba-gebeeyey, ayaa qoddobada heshiiska looga gaaray kamid ah “marxaladda ka dambeysa deyn cafinta Soomaaliya”.

Golaha ayaa ugu horreyntiina wuxuu bogaadiyay horumarka laga gaaray hanaanka deyn cafinta oo gebo-gebo maraya, iyaga oo isla gartay in dhameystirka hanaanka deyn cafinta dalka uu yahay mudnaan qaran.

Madaxda Golaha Wada-tashiga Qaranka ayaa isla qaatay in la dejiyo qorshe lagu dardar-gelinayo maareynta marxaladda ka dambeysa deyn cafinta dalka, iyada oo la xoojinayo wada-shaqeynta hay’adaha maaliyadda iyo adkaynta hufnaantood.

Madaxda ayaa sidoo kale isla gartay in qorshaha deynta cusub looga qaadanayo dalalka deeqaha bixiya iyo hay’addaha caalamiga ah lagu saleeyo mashaariic isbixin kara si dib loogu gudo deyntaasi, taasi oo qeyb ka ah qorshaha ay Soomaaliya ku dalbaneyso deyn cusub oo balaayiin dollar ah.

“Goluhu wuxuu isla gartay in deymaha dalka uu mustaqbalka qaadanayo ay noqdaan deymo u adeegayo horumarinta dhaqaalaha dalka oo la gelinaayo mashaariic is bixin kara, loona qoondeeyo si isku dheelitiran, loona maamulo si hufan, isla markaasna aan culeys deymo saari doonin jiilalka Soomaaliyeed ee mustaqbalka.”

Golaha Wada-tashiga Qaranka ayaa waxa kale oo uu taageeray tallaabada uu dhawaan qaadeen Golaha Dhaqaalaha Qaranka, “Si loo gaaro Soomaaliya xasilloon oo barwaaqo ah, goluhu wuxuu taageerayaa dadaallada dalka loogu sameynayo Hiigsiga Qarni-jirsiga Soomaaliya ee 2060-ka.”

Golaha Dhaqaalaha Qaranka oo dhawaan ku shiray Villa Somalia, iskugu raacay in dalka uu yeesho hiigsiga 2060, iyaga oo meel-mariyay talooyinkii ka soo baxay wajiga 1-aad ee geeddi-socodka diyaarinta hiigsiga 2060, sida lagu shaaciyay war-murtiyeed ay Villa Somalia kasoo saartay shirkaan.

Golaha ayaa waxa uu sidoo kale isla meel-dhigay in hiigsiga 2060 uu noqdo dukumentiga hagi doona dhammaan qorshahayaasha horumarineed ee dalka, si loo xaqiijiyo Soomaaliya xasilloon, barwaaqo ah, dadkeeduna haystaan nolol tayadeedu sarrayso.

Si kastaba, arrimahaan ayaa imanaya xilli uu si habsami leh u socdo barnaamijka deyn cafinta Soomaaliya, islamarkaana la qorsheynayo in dowladda ay qaadato deyn boqolaal bilyan oo dollar ah.

The post Golaha Wadatashiga Qaran oo ka heshiiyay ‘marxaladda ka dambeysa’ deyn cafinta appeared first on Caasimada Online.