Beesha Reer Aw-Xasan oo bayaan culus kasoo saartay doorashada kursiga HOP086

[Deeq A.]

Muqdisho (Caasimada Online) – Beesh Reer Aw-Xasan ayaa maanta bayaan culus kasoo saartay kursiga beesha ee tirsigiisu yahay HOP#086, kaasi oo hore loogu diiday agaasimihii hore ee NISA Fahad Yaasiin.

Kursigan oo la filayo in dhawaan la qabto doorashadiisa ayaa waxay odayaasha dhaqanka beesha ku eedeeyen guddiga KMG ah ee doorashooyinika kuraasta bannaan, wasiir Faarax Cabdulqaadir iyo ra’iisul wasaare Xamza in ay si wadajir ah uga shaqeynayaan duud-siinta xuquuqda odayaasha beesha ee kursigan iyo warejintiisa.

“Waxaan caddeynaynaa in Deegaan doorashada Kursiga HOP086 ay tahay Degmada Beledweyne, mana jiro go’aan lagu soo wareejinayo ama heshiis odayaasha dhaqanku ay ka gaareen arrintaas,” ayaa lagu yiri bayaanka kasoo baxay guddiga dhaqanka ee reer Aw-Xasan.

Qoraalka kasoo baxay odayaasha beesha reer Aw-Xasan oo si toos ah ugu socday madaxweynaha dowlad-goboleedka HirShabelle, guddiga KMG ee doorashada, guddoomiyaha Maxkamadda Sare, duubabka dhaqanka Soomaaliyeed ayaa waxa lagu sheegay in kursigan u xirnayn musharax gaar ah ama jifo gaar ah, ayna ku tartami karaan dhamaan musharixiinta u taagan ee buuxin kara shuruudaha looga baahan yahay.

“Waxaan u sheegeynaa duubabka dhaqanka Soomaaliyeed inay ogaadaan inaan nahay reer si gaar ah hore loogu soo dulmay, walina dulmi ka cabanaya, annaga oo ka rajaynayna inay hiil nagu siiyaan caddaalad darrada nalagu hayo iyo beegsiga sida gaarka ah wali noogu socda.”

Hoos ka aqriso qoraalka kasoo baxay beesha Reer Aw-Xasan oo dhameystiran;

GUDDIGA DHAQANKA EE REER OW-XASAN 

Cabashada Guddiga Dhaqanka Reer Ow-Xasan ee Deegaan Doorashada Kursiga HOP086 

Ku: Madaxweynaha Dowlad Goboleedka Hirshabelle
Ku: Guddiga KMG ee Doorashada Kuraasta Bannaan
Ku: Guddoomiyaha Maxkamadda Sare ee Dalka
Ku: Duubabka Dhaqanka Soomaaliyeed
Og: Xafiiska Ra’iisul Wasaaraha XFS
Og: Guddoonka Golaha Shacabka JFS 

Assalaamu Calaykum Waraxmatullaahi Wabarakatuh Annaga oo ah odayaasha dhaqanka Beesha Reer Ow-Xasan, si gaar ahna u matalna Kursiga HOP086 ee deegaan doorashadiisu tahay Degmada Beledweyne ee Gobolka Hiiraan ee Dowlad Goboleedka Hirshabelle;  

Markii aad aragnay in matalaadda Beesha Reer Ow-Xasan ay uga maqan tahay muddo sanad ku dhaw Golaha Shacabka Jamhuuriyadda Federaalka Soomaaliya sifo aan sharci ahayn;  

Markii aan garwaaqsannay in duruufaha haatan ku xeeran kursigan ay tahay kuwo la siyaasadeeyay, laguna beegsaday beeshan oo kaliya in laga hor istaago inay kursigeeda Golaha Shacabka buuxiso;  

Markii ay noo caddaatay in Guddiga KMG ah ee Doorashooyinika Kuraasta Bannaan, Wasiirka Waxbarashada XFS iyo Ra’iisul Wasaaraha XFS in ay si wadajir ah uga shaqeynayaan duud siinta xuquuqda odayaasha beesha ee kursigan iyo warejintiisa;  

Markii aan eegnay cadaadiska siyaasadeed iyo midka amni ee la saarayo odayaasha dhaqanka ee ka biya diidan wareejinta deegaan doorashada kursiga;  

Markaan dhagaysannay cabashada musharaxiinta beesha ee kursigan u tartamaya oo xaq u leh inay caddaalad u helaan, tartankuna uu noqdo mid daahfuran; 

Waxaan go’aaminnay qodobadan soo socdo;  

1. Waxaan caddeynaynaa in Deegaan doorashada Kursiga HOP086 ay tahay Degmada Beledweyne, mana jiro go’aan lagu soo wareejinayo ama heshiis odayaasha dhaqanku ay ka gaareen arrintaas.  

2. Waxaan raalli galin buuxdo siinaynaa bulshada Reer Hiiraan iyo Maamulka Hirshabelle ee hormuudka u ah halganka dib u xoreynta dalka. Ma mudnayn in maanta la isku dayo in la dhaxal wareejiyo kursi uu deegaankaasi leeyahay ayadoo cillad looga dhigayo amni xumo ka jirta guud ahaan Maamulka.

3. Waxaan aad uga xunnahay in kuraastii lamidka ahayd HOP086 si daahfuran loogu qabtay magaalooyinkii loo asteeyay. Waxaa la yaab nagu noqotay in kuraasta ay hore ugu fadhiyeen Ra’iisul Wasaaraha iyo Taliyaha Nabad Sugidda la mariyay haabraac sax ah, balse si bareer ah loogu xadgudbayo kursiga beesha Reer Aw Xasan oo kaliya. 

4. Waxaan Madaxweynaha, Madaxweyne Ku Xigeenka iyo Wasiirka Arrimaha Gudaha Dowlad Goboleedka Hirshabelle ka dalbanaynaa inay caddeeyaan mawqifkooda ku aaddan isku daygan, ayna hor istaagaan damaca shakhsiga ah ee la doonayo in kursiga loogu wareejiyo deegaan doorasho kale. 

5. Waxaan xaqiijinaynaa inuusan kursigan u xirnayn musharax gaar ah ama jifo gaar ah, ayna ku tartami karaan dhammaan musharixiinta u taagan ee buuxin kara shuruudaha looga baahan yahay.  

6. Waxaan u sheegeynaa duubabka dhaqanka Soomaaliyeed inay ogaadaan inaan nahay reer si gaar ah hore loogu soo dulmay, walina dulmi ka cabanaya, annaga oo ka rajaynayna inay hiil nagu siiyaan caddaalad darrada nalagu hayo iyo beegsiga sida gaarka ah wali noogu socda.  

7. Waxaan cod dheer ugu baaqaynaa Madaxweynaha Jamhuuriyadda Mudane Xasan Sheekh Maxamuud iyo Ra’iisul Wasaaraha XFS Mudane Xamze Cabdi Barre inaysan ku dhicin dabinka loo dhigay, kana fiirsadaan tallaabooyinka caddaalad darrada ah ee ka socda Xafiisyadooda. 

Alle ayaa mahad leh ninkii aaminaa awood leh 

Odayaasha Beesha Reer Ow-Xasan ee soo saaray warsaxaafadeedkan;

1. Suldaan Cabdullaahi Sh. Cumar M. Maxamuud
2. Imaam Bashiir Sh. Cali Ibraahim.
3. Caaqil Ibrahim Yuusuf Muxumed.
4. Nabaddoon Cabdullaahi Sh. Faarax X. Daahir.
5. Nabaddoon Axmed-xaashi Sh. Cabdinaasir.
6. Nabaddoon Deeq Sh. Cumar Diinle
7. Nabaddoon Cabdihaajir Sh Maxamuud
8. Nabaddoon Mukhtaar Sh. Nuurre Cabdullaahi
9. Dr. Abdirashid Sh. Xanafi X. Cabdisuldaan
10. Nabaddoon Faysal Cabdifitaax Sh Axmed
11. Nabaddoon Duulane Cali Cabdiraxmaan

The post Beesha Reer Aw-Xasan oo bayaan culus kasoo saartay doorashada kursiga HOP086 appeared first on Caasimada Online.