Villa Somalia oo shaacisay 4 qodob oo shirka berri looga hadlayo iyo madaxda imaaneysa

[Deeq A.]

Muqdisho (Caasimada Online) – Dowladda Federaalka Soomaaliya  ayaa Muqdisho ku marti-gelinaysa Shirka Soomaliya iyo Dalalka Safka hore (Jabuuti, Kenya iyo Itoobiya) oo soconaya inta u dhaxeysa 31-ka Janaayo iyo 1-da Febraayo.

Shirkan ayaa waxaa kasoo qeyb galaya Madaxweynaha dowladda Kenya Mudane William Ruto, Ra’iisul Wasaaraha Xukuumadda Itoobiya Mudane Abiy Axmed iyo Madaxweynaha Jamhuuriyadda Jabuuti Mudane Ismaaciil Cumar Geelle.

Dowladda Federaalka Soomaaliya ayaa waxaa ugu danbaysay in ay marti-geliso shirar-Madaxeedka heer Gobol sannadkii 2016-kii oo Muqdisho ay isugu yimaadeen Madaxweyneyaasha dalalka IGAD.

Ujeedooyinka Shirka Soomaaliya iyo Dowladaha Safka hore:

1-Taageerada gulufka ciidamada iyo shacabka Soomaaliyeed ay ku xoreeyeen deegaanno badan oo argagixisadu muddo ay gacanta ku haysay.

2-In la sameeyo hawlgallo ka dhan ah Alshabaab oo ay si wadajir ah u fulinayaan Ciidanka Xooga Dalka Soomaaliya iyo  Ciidamada Dalalka Safka hore.

3-Baaq mideysan oo ku wajahan Caalamka, kaas oo lagu dalbanayo in la xoojiyo taageerada iyo qalabeynta Ciidamada Soomaaliyeed, si ay degdeg ugu soo afjaraan dagaalka argagixisada.

4-Muujinta khatarta argagixisadu ay ku hayaan xasilloonida gobolka iyo caqabadda ay ku yihiin horumarka shucuubta qaaradda.

Dowladda Soomaaliya ayaa sii hor marsatay cudur-daarka in shirkaas uu sababi doono xirraansho dhinaca wadooyinka ah, waxayna Muqdisho caawa galeysaa bandow sii jiri doona ilaa habeen dambe, maadaama ay joogto wafuudaas isaga imaaneysa gobolka Geeska Afrika.

The post Villa Somalia oo shaacisay 4 qodob oo shirka berri looga hadlayo iyo madaxda imaaneysa appeared first on Caasimada Online.