Xog: Al-Shabaab oo galabta lagu duqeeyey duleedka magaalada Xarardheere

[Deeq A.]

Xarardheere (Caasimada Online) –Faahfaahino hordhac ayaa laga helayaa howlgal qorsheysan oo galabta ciidamada xoogga dalka iyo diyaaradaha dagaalka ay ka fuliyeen duleedka degmada Xarardheere ee gobolka Mudug.

Howlgalkaan waxaa la sheegay inuu yimid kadib markii ay ciidanku heleen xogta Shabaab isku uruursanaya deegaan 10 KM u jira degmada Xarardheere ee gobolka Mudug.

“Ciidanka xoogga dalka iyo xoogagga deegaanka ayaa galabta weerar culus ku qaaday deegaanka Bacadka Faarax Aadan iyo degaan kale oo dhanka qorrax u dhac qiyaastii 10 KM kaga beegan degmada Xarardheere ee gobolka Mudug,” ayaa lagu yiri qoraal ay baahisay warbaahinta dowladda Soomaaliya.

Qoraalkaan ayaa lagu sheegay in howlgalka uu weli socdo, isla markaana Al-Shabaab lagu gaarsiiyay khasaare badan oo isugu jira dhimasho iyo dhaawac.

Sidoo kale waxaa Al-Shabaab gacanta looga dhigay gaadiid dagaal iyo hub,  sida lagu shaaciyey warkaan.

Kooxda Al-shabaab ayaa maalmo ka hor si nabad ah uga baxday magaalada Xarardheere inta aysan la wareegin ciidamada dowladda Soomaaliya

Sida ay wararku sheegayaan, Al-shabaab waxay qorsheynayeen inay dib u weeraraan Xarardheere, balse ciidamada oo ka war helay ayaa ka hor tegay weerarkaas.

Howlgalkaan ka hor tagga ah ayaa loo adeegsaday diyaaradaha dagaalka, sidoo kale ciidamada kumaandooska Danab ayaa qeyb ka ahaa howlgalka.

Si rasmi ah looma oga khasaaraha ka dhashay howlgalkaas, balse wararka hordhaca ah ee warbaahinta dowladda ay tebisay waxay sheegayaan in khasaare badan la gaarsiiyey kooxda.

The post Xog: Al-Shabaab oo galabta lagu duqeeyey duleedka magaalada Xarardheere appeared first on Caasimada Online.