40 Qof Oo Soomaali Ah Oo Laga Soo Tarxiilayo Mareykanka Iyo Sababta

[Deeq A.]

Sannadahan dambe waxaa sii badeyneysay tirada tahriibeyaasha Soomaalida ah ee ku waajahan dalka Mareykanka, kuwaasoo si la mid ah tahriibeyaasha kale ee caalamka safar ku sii mara dalalka Qaaradda Koonfurta Ameerika. Waxaase dadkaas qaarkood dib loo soo celiyaa marka ay Mareykanka galaan ka dib.

Intii uu xukunka hayay madaxweynihii hore ee Mareykanka, Donald Trump ayey hoos u dhacday tirade tahriibeyaasha Soomaalida ah ee u hanqal taagayay Mareykanka, balse markii uu ku guul darreystay dib u doorashada waxaa soo laabtay qulqulkii hore.

Dowladda Madaxweyne Joe Biden waxa ay meesha ka saartay mamnuuciddii dalal ay Soomaaliya ku jirto laga saaray safarrada Mareykanka. Balse dadka tahriibka ku gaadhaya dalkaas qaarkood ayaa ku guul darreysta in la aqbalo.

Soomaali ay tiradoodu tahay 40 qof ayaa hadda la filayaa in dowladda Mareykanku soo tarxiisho.

Afartanka qof ee Soomaalida ah waxa ay hadda tarxiilka ku sugayaan xabsi ku yaalla gobolka Mississippi ee dhaca koonfurta dalka Mareykanka.

Su’aal dad badan isweydiiyaan ayaa ah; maxaa ka khaldama dadka dib loo soo celiyo iyagoo magangalyo doon ah?

Dadka tahriibka ah ee ka tallaaba xadka Maraykanku la leeyahay Mexico ayaa waayadii hore marka maalmo kooban lagu hayo goobo dalkaas ku yaalla kolka dambe laga sii deyn jiray.

Haatan waxay wararku sheegayaan in dadkaas la geeyo xabsi lagu sii hayo inta lagu celinayo wadamadii ay ka yimaadeen.

Haddaba si aan u helno jawaabta su’aasha aan kor ku xusnay, waxaan la hadalnay qareen Soomaali ah lagu magacaabo Maxamuud Muuse Xasan, oo BBC-da u sharraxay sababta dadka qaar dib loogu soo tarxiilo iyagoo maray tahriib dheer.

“Dadka marka xabsiga la geeyo waxaa laga yaabaa in qaarkood dib loogu celiyo Soomaaliya, maadaama magangalyada ay qorteen ayna ahayn mid xooggan oo waxyaabihii la weydiiyay, cabsidii su’aalaha [ay wax kaga khaldameen],” ayuu yidhi.

Qareenka u warramay BBC-da ayaa sheegay in dadka magangalyo doonka ah qaarkood ayna fahansaneyn sida dacwadda loo sameysto.

“Dabcan marka dacwadda la qorayo waa in dacwaddaadu ay tahay mid xooggan oo caddeyneysa dhibaatadii aad ka soo tagtay iyo dhibkii kusoo gaadhay,” ayuu sii raaciyay hadalkiisa.

Dhowrkii sanno ee ugu dambeeyay waxaa Mareykanka ka taagneyd xiisad la xidhiidha dadka soo galootiga ah ee ay Soomaalidu ka mid yihiin, waxaana gobollada qaar ay ka cabanayeen tirada tahriibeyaasha oo aad ugu badatay.

Bishii September, laba Bas oo wada tahriibeyaal ayaa laga kaxeeyay gobolka Texas, dhammaan dadkaasna waxaa lagu daadiyay bannaanka hore ee guriga ay Washington ka daggan tahay madaxweyne ku xigeenka Mareykanka, Kamala Harris.

Amarka dadkaas lagu geeyay guriga Harris, oo uu bixiyay guddoomiyaha gobolka Texas, ayaa yimid ka dib markii ay xoogeysatay xiisadda siyaasadeed ee ka dhalatay tirada tahriibeyaasha ee badatay.

Guddoomiyaha Texas oo kasoo jeeda xisbiga Jamhuuriga ayaa sheegay in tallaabadaas oo ay si ulakac ah u sameeyeen ay ku dalbanayeen in dowladdu ay keento siyaasado cusub oo lagu xakameynayo soo galootiga.

Murankaas ayaa ilaa hadda taagan, xilli ay dad cusub maalin walba kasii gudbayaan xadka u dhaxeeya Mareykanka iyo Mexico.

Source