Toogasho dad badan lagu laayey oo ka dhacday iskuul ku yaalla dalka RUUSHKA

[Deeq A.]

Moscow (Caasimada Online) – Nin hubaysan ayaa toogasho ka geystay dugsi ku yaalla Jamhuuriyadda Udmurtia ee dalka Ruushka, isaga oo dilay ugu yaraan 15 qof oo ay ku jiraan 11 caruur ah.

Waa toogashadii afraad ee lala beegsado dugsiyada waxbarashada, ee ka dhacda gobolkaas, 15-kii bilood ee ugu dambeeyey.

Guddida dembibaadhista ee Ruushka ayaa Isniintii sheegtay, in ninka weerarka geystay oo lagu magcaabo Artem Kazantsev, inay da’diisu ay tahay illaa 30 jir.

Artem ayaa ka qalin jebiyey dugsiga No. 88 kaasoo ah dugsi ay dhigtaan arday isugu jirta, heerka barbaarinta illaa dhamaadka dugsiga sare.

Ninkan hubaysan ayaa toogashada ku dilay 15 qof, halka u goobtaas ku dhaawacay illaa 24 qof oo kale oo ay ku jiraan 22 caruur ah.

Toogashada iskuulada iyo xarumaha kale ee waxbarashada ee dalweynaha Ruushka iyo jamhuuriyadii hore ee Soofiyeedka ayaa aad naadir u ahaa ilaa laga soo gaadhayo sannadihii ugu dambeeyay, markaasoo tirada toogashooyinku ay kor u kaceen.

VOA + AP

The post Toogasho dad badan lagu laayey oo ka dhacday iskuul ku yaalla dalka RUUSHKA appeared first on Caasimada Online.