Booliska Sacuudiga Oo Xidhay Nin Cumro U Sameeyey Boqoraddii Dhimatay Ee UK

[Deeq A.]

(SLT-Riyadh)-Booliska dowladda Sacuudiga ayaa xabsiga u taxaabay nin sheegay inuu cumro u niyeystay boqoradii dhawaan geeriyootay ee dalka UK Queen Elizabeth II.

Hay’adda Ammaanka Dadweynaha ee Sacuudiga ayaa Twitter-ka ku sheegtay in ninkaan oo kasoo jeedo dalka Yemen loo xidhay inuu ku xad-gudbay xeerarka Cumrada u dajisan, islamarkasna uu iska soo duubay muuqaal isago wata boodh ay ku qoran tahay “Cumro ayaa u neystay boqorad Queen Elizabeth II, waxaana Allah ka baryeenaa inuu u aqbalo oo janada uu geliyo.”

Hay’adda ayaa sheegtay in kiiska ninkaan loo gudbiyey xeer ilaalinta si ay baadhitaan ugu sameyso, islamarkaana uu u maro ciqaabta u dajisan.

Xadhiga ayaa yimid kadib markii baraha bulshada lagu dhaleeceeyay muwaadinka Yemeniga ah kadib markii muuqaalkiisa uu noqday mid si weyn loo hadal hayo.

Shareecada Islaamku waxay u ogolaatay Muslimiinta inay u soo xajiyaan ama cimreeyaan iyagoo ka wakiil ah Muslimiinta dhintay, laakiin lama ogola in cumro loo sameeyo dadka aan islaamka aheyn ee dhinta.

Boqorada Elizabeth, oo dhimatay Khamiisti iyada oo jirta 96, waxay ahayd Kiristaan ​​ku adag diinteeda, waxayna sidoo kale soo noqotay guddoomiyaha ugu sarreeya Kaniisada England.

Caalim u dhashay dalka Masar, oo wax ka dhiga jaamacada Al-Azhar oo ka mid ah jaamacadaha ugu caansan caalamka ee lagu barto diinta islaamka, ayaa hadal uu siiyay telefishenka taageera dowladda waxa uu ku dhaleeceeyay ninkan Yemeniga ah inuu ku kacay fal ka baxsan diinta islaamka.

Source