James Swan “Soomaaliya waxay wajahaysaa musiibo banii’aadanimo”

[Deeq A.]

Ergeyga gaarka ah ee Qaramada Midoobay u qaabilsan Soomaaliya James Swan ayaa sheegay in Soomaaliya wajahayso musiibo banii’aadanimo oo ay sababtay abaartii ugu xumayd ee dalka soo marta mudda ku siman 40 sano.

“Soomaaliya waxa ay wajaheysaa musiibo beni’aadanimo iyada oo ay 7.8 milyan oo Soomaali ah — ku dhawaad kala bar qiyaasta shacabka dalka — saameeyeen abaarihii ugu xummaa ee dalka soo mara muddo ugu yaraan afartan sano ah. Iyada oo ay afar xilli roobaad oo is xig-xiga baaqdeen, ayey meelo dalka ka mida wajahayaan khatarta macluul” ayuu yiri James Swan oo warbixin ku saabsan xaaladda Soomaaliya siinayay Golaha Ammaanka Qaramada Midoobay.

Ergeyga gaarka ah ee Qaramada Midoobay ayaa sheegay in Taageerada deegsinimo ee deeq-bixiyeyaasha awgeed, hay’adaha gargaarku ay  tan iyo bishii Janaayo afar laabeen tirada dadka kaalmada la gaarsiiyey oo gaartay 5.3 milyan, Hase ahaatee, baahidii oo marba ka sii dareysa iyo xilli roobaadkii shanaad oo la saadaalinayo in uu baaqdo.

“Taageerada deegsinimo ee deeq-bixiyeyaasha awgeed, hay’adaha gargaarku waxay tan iyo bishii Janaayo afar laabeen tirada dadka kaalmada la gaarsiiyey oo gaartay 5.3 milyan. Hase ahaatee, baahidii oo marba ka sii dareysa iyo xilli roobaadkii shanaad oo la saadaalinayo in uu baaqdo, waxaa lagama maarmaan noqonaysa in sare loo qaado kaalmada beni’aadanimaha”

“Waxaan ugu baaqayaa dhammaan dhinacyada Soomaaliya in ay fududeeyaan gaarsiinta kaalmada beni’aadanimo. Waxaana ugu baaqayaa dhammaan saaxiibbada Soomaaliya in ay si degdeg ah u kordhiyaan deeqda loo baahan yahay” ayuu sii raaciyay.

James Swan ayaa sidoo kale tilmaamay in dhibaatada beni’aadanimo ee hadda jirta ay si gaar ah u kordhisay nugeylka haweenka iyo carruurta barakaca ah, oo weligoodba wajihi jiray takoor iyo xaqiraad xagga adeegyada ah, waxaana uu ugu baaqayaa mas’uuliyiinta/hay’adaha Soomaalida in ay kordhiyaan tallaabooyinka ka hortagga khatarta tacaddiyada jinsiga ee sida gaarka ah loogu geysto haweenka iyo gabdhaha, taasoo ay ka midtahay in la adkeeyo amniga goobaha biyaha laga dhaansado iyo xarumaha cunto qeybinta.

“Dhibaatada beni’aadanimo ee hadda jirta ayaa si gaar ah u kordhisay nugeylka haweenka iyo carruurta barakaca ah, oo weligoodba wajihi jiray takoor iyo xaqiraad xagga adeegyada ah. Waxaan ugu baaqayaa mas’uuliyiinta/hay’adaha Soomaalida in ay kordhiyaan tallaabooyinka ka hortagga khatarta tacaddiyada jinsiga ee sida gaarka ah loogu geysto haweenka iyo gabdhaha, taasoo ay ka midtahay in la adkeeyo amniga goobaha biyaha laga dhaansado iyo xarumaha cunto qeybinta” ayuu ku daray Hadalkiisa.

PUNTLAND POST

The post James Swan “Soomaaliya waxay wajahaysaa musiibo banii’aadanimo” appeared first on Puntland Post.