Sawirro: Dowladda Turkiga oo ballan-qaad muhiim ah u sameysay Soomaaliya

[Deeq A.]

Muqdisho (Caasimada Online) – Safiirka dowladda Turkiga ee Soomaaliya oo maanta kulan la qaatay Ergeyga gaarka ah ee Madaxweynaha Soomaaliya u qaabilsan arrimaha gurmadka Abaaraha ayaa ballan-qaaday in dowladiisa ay si buuxda ula shaqeyn doonto.

Danjire Mehmet Yilmaz ayaa Mudane Cabdiraxmaan Cabdishakuur Warsame u sheegay in dowladiisa ay door muhiim ah ka qaadan doonto samatabixinta malaayiinta qof ee abaaruhu saameeyeen.

Kulanka Danjiraha iyo Ergayga gaarka ah ayaa qeyb ka ah kulamo kala duwan oo uu maalmihii u dambeeyay looga hadlayay xaalada abaareed ee dalka iyo sidii ay dalalka beesha caalamka uga qeyb qaadan lahaayeen.

Ugu dambeyntiina Ergayga ayaa uga mahad-celiyay Safiirka iyo dowladda Turkiga taageerada ay u muujiyeen shacabka Soomaaliyeed ee ay halakeeyeen abaaraha.

Ergayga gaarka ah ee arrimaha gurmadka abaaraha ayaa sidoo kale goor sii horeysay la kulmay safiirka dowladda Imaaraadka Carabta, oo asagu muujiyey sida ay dowladiisa uga go’an tahay garab istaaga dowladda iyo shacabka Soomaaliyeed.

Danjire Mohammed Ahmed Othman Al Hammadi ayaa asagna ballan-qaaday wada-shaqeyn buuxda si loo samatabixiyo malaayiinta qof ee abaaruhu saameeyeen, xilli ay dhawaan deeq lacageed ay ku wareejiyeen dowladda.

The post Sawirro: Dowladda Turkiga oo ballan-qaad muhiim ah u sameysay Soomaaliya appeared first on Caasimada Online.