Madaxweyne Xasan oo Cabdiraxmaan Cabdishakuur u Magacaabay Ergay Gaar ah

[Deeq A.]

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa u magacaabay Mudane Cabdiraxmaan Cabdishakuur Warsame Ergeyga Gaarka ah ee u qaabilsan arrimaha gurmadka Abaaraha Soomaaliya, kaddib markii uu qiimeeyay baaxadda iyo culeyska xilligan adag ay dadka Soomaaliyeed kala kulmayaan Abaaraha.

Magacaabidda Ergeyga Gaarka ayaa muujineysa sida uu Madaxweynuhu mudnaan gaar ah u siinayo abaaraha ka jira dalka kuwaas oo in badan soo laablaabtay iyo wax ka qabashada waxyeeladeeda oo saameyn weyn ku yeelatay nolosha dadka iyo duunyada ku dhaqan gayiga  Soomaaliyeed ee xoolo dhaqatada ah iyo kuwa aan aheyn intaba ee Beeraha tabcada.

Ergeyga Gaarka ah ayaa loo xilsaaray inuu heer qaran, heer gobol iyo calami intaba kala shaqeeyo dhammaan dhinacyada ay khuseyso iyo daneeyayaasha kale, si loo helo xal waara oo lagu yareeyn karo, loogana gudbi karo saameynta abaaraha, taas oo sanadii lasoo dhaafay dhowr jeer  ku dhufatay dalka, taas oo ay ku baxeen duunyo badan .

Ergeyga gaarka ah wuxuu kale oo uu hormuud u noqon doonaa, isku dubaridka iyo u ololeynta kaalmooyinka caalamiga ah.

Madaxweynaha ayaa Mudane Cabdiraxmaan Cabdishakuur xilka Ergeyga u magacaabay, iyadoo la eegayo khibradiisa iyo fahamka uu u leeyahay arrimaha bini’aadantinimada iyo horumarinta bulshada.

Madaxweynaha ayaa u rajaynaya Ergeyga inuu u Ilaahay u fududeeyo gudashada mas’uuliyadda uu u igmaday. waxayna magacaabistan ay dhaqangaleysaa isla maanta oo taariikhdu tahay 24 May, 2022.Cabdiraxmaan ayaa ahaa hoggamiyihii Xisbiga Wadajir waxaana uu ahaa musharraxiintii u tartantay xilka madaxweynaha 15-kii May.

Goobjoog News

Source: goobjoog.com