Khilaaf xooggan oo ka taagan safaarada Soomaaliya ee magaalada Roma ee Talyaaniga

[Deeq A.]

Khilaaf xooggan oo ka taagan safaarada Soomaaliya ee magaalada Roma ee Talyaaniga

Khilaaf xooggan iyo buuq ayaa ka taagan safaarada Soomaaliya ee magaalada Roma ee dalka Talyaaniga, kaddib markii wasaarada arrimaha dibadda Soomaaliya ay u yeedhtay safiirka safaarada

Wasaarada ayaa sidoo kale magacawday ku sime cusub oo wada shaqadda, balse safiirka ayaa ka horyimid go’aanka wasaarada, isagoo ku dooday in ku simaha cusub ee lasoo magacaabayo uu noqdo qof ka shaqeynayay safaarada.

“Mar kasta oo aan aado fasax waxaa shaqadda safaarada sii maamuli jiray ku sime ka shaqeeya safaarada, haddana haddii lasoo magacaabayo ku sime cusub waa in uu noqdaa qof ka shaqeynayay safaarada”, ayaa laga soo xigtay Danjire Cabdiraxmaan Sheekh Ciise.

Ku simaha cusub oo lagu magacaabo Axmed Cabdiraxmaan Sheekh Nuur iyo labo xubnood oo la socday ayaa galay dhismaha safaarada, kaddibna waxaa ay diideen in safiirka iyo xubno kamid ah shaqaallaha ay soo galaan dhismaha safaarada.

Ilo wareedyo ayaa sheegay in saddexda xubnood ay ku dhex jiraan gudaha safaarada, balse Danjire Cabdiraxmaan Sheekh Ciise, ayaa rajeynaya maalinta talaadada ah in uu ugu yeedho ciidanka dowladda Talyaaniga si ay usoo fara-geliyaan arinta.

War-saxaafadeedka ka soo baxay wasaarada arrimaha dibadda Soomaaliya ayaa lagu sheegay in Danjire Cabdiraxmaan Sheekh Ciise loogu yeedhay wadatashi, halka wasaarada ay ka codsatay dhigeeda dalka Talyaaniga in Axmed Cabdiraxmaan Sheekh Nuur oo ah ku simaha cusub loo fududeeyo wax kasta oo uu u baahanyahay si uu u guto waajibaadkiisa shaqo ee safaraada Soomaalidda ee magaalada Rome.

Qaran News