Maamulka Garbahaarey oo qaaday tallaabo xasaasi ah oo looga hortagayo qorshe…

[Deeq A.]

Muqdisho (Caasimada Online) – Mas’uuliyiinta ugu sareeysa maamulka degmada Garbahaarey ee xarunta gobolka Gedo oo shalay shir jaraa’id qabtay ayaa si adag uga horyimid in halkaas uu tago gudigii qiimeynta Garbahaarey u magacaabay Ra’iisul Wasaare Maxamed Xuseen Rooble.

Guddoomiye ku-xigeenka amniga iyo siyaasadda degmada Garbahaarey ayaa shirkadaha diyaaradaha uga digay inay soo qaadan guddigaas, oo ay sheegen in uu yahay guddi lagu dhisay sharci darro.

“Shirkadii soo qaada guddiyadaas iyo dad aan isku ogeyn mas’uuliyadeeda wixii ka yimaada iyada ayaa qaadaneysa. Haddii xuquuqdayadii la diiday oo Ra’iisul Wasaaraha iyo dad ku lug leh diideen waxaa ku qasbanahay in aan gobolkayagii u madax-banaano,” ayuu yiri.

“Guddigaas ma imaan karaan Garbahaarey iyo gobolka Gedo. Mana imaan karaan ragaas iyo wixii ku lug leh.”

Waxay ku doodeen in ka maamul ahaan ay ka hortagayaan waxkasta oo ka hor imaanaya heshiiskii doorashooyinka ee 17-kii September iyo is-afgaradkii magaalada Baydhabo ee xarunta gobolka Baay.

Sidoo kale waxay sheegen in Guddiga uu hoggaaminayo Cumar Dhageey uu yahay mid sharciga baalmarsan, islamarkaana aysan aqbaleyn inay Garbahaareey tagaan, wuxuuna si cad u sheegeen in Garbahaarey horay loo qiimeeyay doorashana lagu qaban karo.

Go’aankaan ayaa imanaya xili la filayay in maalinta berri ah ay degmadaas tagaan guddiga uu Ra’iisul Wasaare Rooble u magacaabay qiimeynta Garbahaarey, oo kamid ah deegaanada ay ka dhaceyso doorashada Golaha Shacabka.

Arrintan ayaa dab kusii shideysa xiisada gobolka Gedo, kaasi oo u dhaxeeya Villa Somalia iyo maamulka Jubbaland ee uu hogaamiyo Axmed Madoobe, iyada oo halkaas yaalan 16 kursi oo la filayo in doorashadooda la qabto.

The post Maamulka Garbahaarey oo qaaday tallaabo xasaasi ah oo looga hortagayo qorshe… appeared first on Caasimada Online.