Wararkii u Danbeeyay ee Dagaalka Ukraine+Ciidamada Ruushka oo Guuldaro la kulmay & Askar laga qabsaday

[Deeq A.]

Ciidamada Ruushka oo Guuldaro la kulmay,Askarna laga qabsaday

 

Muuqaallo lagu shaaciyay baraha Twitter-ka, TikTok iyo Facebook ayaa muujiyay caddeymo sheegaya in jab loo geystay ciidamada Ruushka ee dagaalka ku galay Ukraine.

Militeriga Ukraine ayaa su’aalo weydiiyay askar ka tirsan ciidanka Ruushka oo ay maxaabiis ahaan u qabteen, halka kuwo kalena ay dhibaatooyin xagga dhimirka ah qabsadeen kaddib markii ay lama filaan ku noqotay in gacanta lagu dhigay.

Qaar ka mid ah askarta la qabtay ayaa sheegay in aysan ka warqabin in loo soo diray Ukraine, naxdin xoog lehna ay kala kulmeen saaxiibbadooda dhintay.

Hal askari oo da’ yar ayaa la arkayay isagoo madaxa jilbaha dhexdooda gashanaya si uu wejigiisa u qariyo, xilli dadka ku hareereysan ay aflagaaddeynayeen madaxweyne Putin.

Askari kale ayaa isagana markii la weydiiyay inuu farriin u dirayo qoyskiisa waxa uu yidhi: “Waan idin jeclahay”.

Militeriga Ruushka ayaa iskacaabbin xoog leh kala kulmay ciidanka Ukraine oo acan ka helaya shacab is xilqaamay oo hubka qaatay.

Dagaalka lagu doonayo in lagu qabsado caasimadda Kyiv ayaa weli socda, madaxweynaha dalkaasna waxa uu sheegay in uu sii wadi doono difaaca.

Kyiv oo uu gabalku u dhacay iyadoo weerar ku socdo

Gabalka ayaa u dhacay magaalada Kyiv kaddib markii uu saddex maalmood ka socday dagaal gaaray guud ahaan waddanka Ukraine.

Magaalada ayaa lagu soo rogay bandow uu amray Duqa Kyiv, Vitali Klitschko. Dhaqdhaqaaqa ayaa la xannibay wixii ka billowda shanta galabnimo.

Duqa magaalada ayaa bartiisa Twitter-ka soo dhigay farriin uu ku sheegayo in qof walba oo rayid ah oo lagu arko magaalada waqtigaas kaddib loo arki doono “inuu ka mid yahay cadowga taageerayaashiisa”.

Saraakiisha Gaashaandhigga UK ayaa sheegay in ciidamada Ruushka ay magaalada Kyiv u jiraan 30 kiiloo mitir.

Balse madaxweyne Volodymyr Zelensky ayaa weli ku sugan magaalada caasimadda ah waxa uuna farriimo lid ku ah Ruushka kasoo dirayay xafiiskiisa, isagoo ay ku hareereysan yihiin militeriga.

Qaran News