Shiinaha Oo Bilaabay Ugaadhsiga Dalalka Xidhiidhka La Sameeyay Taiwan, Khatar Ku Soo Waajahan Somaliland

[Deeq A.]

(SLT- Beijing)-Shiinaha ayaa joojiyay iibsashada hilibka lo’da, waxyaabaha caanaha laga sameeyo iyo khamriga ee ka soo geli jiray dalka Lithuania, xilli uu sii xumaanayo xidhiidhka gobolka Baltic-ga ee Taiwan.

Maamulka Guud ee kastamka Shiinaha, ayaa hakiyay dhoofinta sababo la xidhiidha “sharci la’aan”, wakaaladda Lithuania ayaa sidaas ku sheegtay bayaan ay soo saartay. Tallaabadan ayaa timid ka dib markii Lithuania ay u ogolaatay Taiwan inay safaarad ka furato halkaas.

Waaxda adeegga cuntada iyo caafimaadk xoolaha ee Lithuania ayaa sheegtay in “ilaa iyo hadda ayna ka helin wax ogeysiis ah Shiinaha oo sheegaya in wax macluumaad ah ama xog ah ay maqan yihiin”.

Wakaaladdu waxay sheegtay in mas’uuliyiinta Shiinuhu ay sannadkii 2020-ka sameeyeen baadhitaan fog oo ku saabsan dhoofinta hilibka lo’da iyo kalluunka Lithuania.

Waxay intaa ku dartay in ayna jirin wax cabasho ah oo laga qabo, dhoofintana ay si habsami leh u socotay illaa dhammaadkii sannadkii hore.

Faahfaahin dheeraad ah lagama bixin sababta iibka u joogsaday. Wasaaradaha arrimaha dibadda ee Shiinaha iyo Taiwan ayaa ka gaabsaday codsiyo ay BBC-da ku weydiisay arrinkan.

Somaliland ayaa ka mid ka mid ah labada dal ee Afrika ee xidhiidh diblomaasiyadeed oo buuxda la leh Taiwan. Midkii ugu horreeyay wuxuu ahaa dalka yar ee Eswatini, oo xidhiidh la yeeshay 1968.

Shiinaha ayaa sidoo kale laga yaabaa inuu isha ku hayo saaxiibtinimada Somaliland iyo Taiwan isagoo ka cabsi qaba, maxaa yeelay waxay ka aasaastay saldhig millatari oo ka baxsan dalkeeda.

Source