Madaxweyne Farmaajo oo gaaray Addis Ababa

[Deeq A.]

Madaxweynaha dowladda federaalka Soomaaliya Maxamed Cabdullaahi Farmaajo iyo wafdi uu hoggaaminayo ayaa gaaray magaalada Addis Ababa, isaga oo halkaas kaga qayb galaya meertada 35-aad ee shirweynaha Ururka Midowga Afrika.

Madaxweyne Farmaajo iyo wafdigiisa waxaa halkaas ku soo dhoweeyay wasiiro kala duwan oo ka tirsan Xukuumadda Ra’iisal Wasaare Abiy Axmed iyo safiirka Soomaaliya u jooga dalka Itoobiya danjire Cabdullaahi Amxed Jaamac (Ilka-jiir).

Shirweynaha Ururka Midowga Afrika oo ay ka qayb galayaan hoggaamiyeyaasha dalalka Afrika iyo madax kale, ayaa looga arrinsanayaa dib-u-habaynta Ururka Midowga Afrika, hirgelinta hiigsiga Ururka ee sannadda 2063 iyo wax ka qabashada caqabadaha kala duwan ee ay qaaraddu wajahayso oo ay ugu horreeyaan rabshadaha, saboolnimada, cunno yarida iyo cudurka COVID-19.

Madaxweyne Farmaajo iyo wafdigiisa ayaa soo bandhigi doona aragtida dowladda federaalka Soomaaliya ee ku aaddan mustaqbalka qaaradda Afrika iyo dadaalada Soomaaliya ee ku wajahan la dagaallanka argagixisada, ka soo kabashada saamaynta COVID-19, wax ka qabashada fatahaadaha, ka gaashaamashada abaaraha iyo la dagaallanka ayaxa, kuwaas oo ah khataro ay wajahayso qaaradda Afrika.

Wafdiga dowladda federaalka Soomaaliya ee uu hoggaminayo Madaxweyne ayaa inta ay ku sugan yihiin magaalada Addis Ababa, waxa ay kulan doceedyo la yeelan doonaan hoggaamiyeyaasha dalalka Afrika iyo madaxda kale ka ee ka soo qayb galaysa shirweynahan Midowga Afrika.

9

PUNTLAND POST

The post Madaxweyne Farmaajo oo gaaray Addis Ababa appeared first on Puntland Post.