Jubbaland oo qabaneyso doorashada 6 kursi iyo xubnaha ku fadhiyey oo…

[Deeq A.]

Kismaayo (Caasimada Online) – Magaalada Kismaayo ee xarunta gobolka Jubbada Hoose waxaa maanta lagu wadaa in lagu qabto doorashada 6 kursi oo ka mid ah xubnaha Golaha Shacabka Soomaaliya ee ka imaanaya Jubalanad.

Qaban-qaabada doorashada ayaa haatan si weyn looga dareemayaa magaallo xeebeedka Kismaayo, waxaana loo adkeeyey ammaanka magaaladaasi.

Illaa 12 musharrax ayaa u tartamaya kuraasta maanta doorashadooda la qabanayo, kuwaas oo buuxiyey shuruudihii looga baahnaa.

Lixda kursi ee doorashadooda la qabanayo ayaa kala ah: 1-Hop107 oo ay ku fadhisay Xaawo Maxamed Aadan, 2-Hop114 oo uu ku fadhiyey Cabdulqaadir Maxamed Cismaan, 3-Hop120 oo uu ku fadhiyey Cabduqaadir Sheekh Cali Ibraahim (Baqdaadi) oo mar soo noqday wasiiru dowlaha madaxtooyada Soomaaliya, 4-Hop111 oo uu ku fadhiyey Maxamed Nuur Iftin Shambara, 5-Hop028 oo uu ku fadhiyey Cabdullaahi Maxamed Aadan Shaacir iyo 6-Hop093 oo uu ku fadhiyey Wasiirkii hore ee Diinta & Awqaafta Sheekh Nuur Maxamed.

Tartanka ayaa waxaa gabi ahaan laga reebay xildhibaanadii horey ugu fadhiyey 5 kursi ee ay Jubbaland qabaneyso doorashadooda, waxaana xubnaha la shaaciyey ee tartamaya ay yihiin kuwa cusub, isla-markaana ay ku jiraan xubno aad ugu dhow Axmed Madoobe.

Dhinaca kale guddiga doorashada Jubbaland ee SEIT ayaa shaaca ka qaaday in tallaabadan ay qayb ka tahay fulinta heshiiskii doorashooyinka ee dhowaan lagu gaaray Muqdisho.

Sida uu qorshuhu yahay doorashada ayaa lagu wadaa in lasoo gabagabeeyo 25 Febraayo ee sanadkan 2022-ka, si markaas loo guda-galo doorashada madaxweynaha.

Soomaaliya ayaa ku daahday xaaladda kala guurka ah ee ay haatan ku jirto, kadib markii ay soo noq-noqdeen muranada ka taagan hannaanka loo wajahayo doorashooyinka dalka.

The post Jubbaland oo qabaneyso doorashada 6 kursi iyo xubnaha ku fadhiyey oo… appeared first on Caasimada Online.