Maxay dadka dunida ugu mashquulka iyo maalka badani u noqdeen kuwa ugu akhriska badan, halka kuwa ugu saboolsan ee ugu furaaqada badanna ka yihiin kuwa ugu akhriska yar?

[Deeq A.]

“Rabboow ummaddayda akhriska u sahal, kiisa warqadaha ku qoran, iyo kan abuurriinkaaga laga daalacdo labada ba, oo Rabboow akhrisku adiga na kaa baraa, noona kaa keenaa.” Cabdinaasir Axmed Abraham

Maareeyayaasha shirkadaha dunida ugu waaweyn maamula ayaa sannadkii celcelis ahaan 80 buug akhriya, arrintaasi qof ahaan si bay ii damaqday waxa aanan is-weydiiyay sida shakhsiyaadka mugga culayska shaqo ee saaran intaas leeg uga akhris badan karaan dadka saboolka ah ee sidayda xoolo miyi iyo kuwa magaalo oo ay ku mashquulaan aan midna hayn? Ugu dambayn waxa aan ogaaday in aan sirtu ahayn furaaqada ee ay tahay fahanka ahmiyadda akhriska. Sidaas darteed ayay dadka hodanka ahi si kasta oo ay u mashquulsan yihiin qiime sare ugu bixinayaan akhriska. Hadda ba ficilka ragannimada leh waa in aan la tartanno kuwa dunida ugu akhriska badan innaga oo furaaqada ka faa’iidaysannayna. Sidaas darteed guusheennu waxay ku jirtaa in aan ka xorowno “ GAASHADA MAANKA” ereygaas oo falsafad qoto-dheer ku fadhiya waxa aan markii ugu horreysay isaga oo adeegsanaya arkay M. Ibraahim” Hadraawi” wuxuu u dhignaa sidan; “Inta maanku gaajaysan yahay, Guuli waa weli” Gudgude.
Gaajada maanku waa jahliga, dhuuniga maankuna waa cilmiga. Idil ahaan mashaakilaadka bani’aadkuna waxay hadhsadaan geedka JAHLIGA. Haddaba si aan gobonnimo iyo xornimo wada jira u helno liibaana’e akhris la’aantu waa igu ceeb, waa innagu ceeb, waa idinku ceebe sideen uga baxnaa? Ugu dambayn bartan waxa aan idinku wadaagayaa aragti falsafadeed oo tidhaa; ka dheeroow wax kasta oo macaan haddana cimri-gaaban. Naftaadan bar wax kasta oo qadhaadh oo raan-dhiis leh. Akhriskua wuxuu ugu mudan yahay waxyaabaha qadhaadhka yar leh ee cidhibta wanaagsan. Gunaanadka su’aal iyo soojeedin baan idiinka tagayaa, aan su’aasha ku horreeyo waxaan ku jirnaa bishii ugu dambaysay sannadka imisa buug baad akhriday? Haddii aanad waxba akhriyin hadda bilaw inta sannadka ka hadhay afar buug waad dhammayn kartaa.

FG: Iyada oo baraha bulshada ay joogaan dadkii cilmiga ehelka u ahaa in aan anigu dadka akhris ku waaniyaa waa uun caalamad ka mid ah; dhiiranaanta iyo indho-adayga jahliga. Iyana cafis baan ka dalbanayaa.

 

Abdinaasir Ibrahim

somaliland_author@yahoo.com

Qaran News