Madaxweyne Farmaajo oo waraaqaha ka aqoonsiga ka guddoomay danjireyaal cusub

[Deeq A.]

Madaxweynaha dowladda Federaalka Soomaaliya Maxamed Cabdullaahi Farmaajo ayaa munaasabad ku qabsoontay Madaxtooyada waxa uu kaga guddoomay waraaqaha aqoonsiga danjirenimo safiirrada cusub ee dalalka Tansaaniya John S. Simbachawene iyo Angoola Sianga Kivuila Samuel Abilio.

Danjiraha Tansaaniya John S. Simbachawene ayaa Madaxweynaha la wadaagay farriin iyo salaan uu uga siday Madaxweynaha dalkiisa Marwo Samia Hassan, taas oo ku aaddan xiriirka soo jireenka ah ee ka dhexeeya labada dal.

Madaxweyne Farmaajo ayaa u rajeeyey Danjire John S. Simbachawene in uu ku guulaysto gudashada waajibaadka loo igmaday iyo doorka uu ka qaadan karo xoojinta xiriirka walaaltinnimo ee ka dhaxeeya Soomaaliya iyo Tansaaniya.

Dhankiisa, Danjiraha cusub ee Jamhuuriyadda Angoola Mudane Sianga Samuel Abilio ayaa soo bandhigay sida ay uga go’an tahay adkaynta xiriirka ka dhexeeya Soomaaliya iyo Dalkiisa, gaar ahaan dhinacyada iskaashiga dhaqaalaha, maalgashiga, diblomaasiyadda iyo isu-socodka, isaga oo uga mahadceliyey shacabka iyo dowladda Soomaaliya soo dhoweynta diirran.

Madaxweynaha Soomaaliya Maxamed Cabdullaahi Farmaajo ayaa la wadaagay Danjiraha cusub ee dalka Angoola sida ay uga go’an tahay Dowladda Federaalka Soomaaliya xoojinta xiriirka ku saleysan iskaashiga, dan-wadaagga iyo saaxiibtinnimada ee ay la leedahay dalalka kale ee qaaradda.

PUNTLAND POST

The post Madaxweyne Farmaajo oo waraaqaha ka aqoonsiga ka guddoomay danjireyaal cusub appeared first on Puntland Post.