Fiqi oo sheegay in ciidan ku sugnaa Galmudug loo soo qaaday Xamar (Dhageyso)

[Deeq A.]

Muqdisho (Caasimada Online) – Wasiirka amniga Galmudug Axmed Macallin Fiqi ayaa sheegay in dowladda federaalka Soomaaliya ay qaar ka mid ah ciidamo ku sugnaa Galmudug iyo gobollo kale ay usoo qaaday magaalada Muqdisho oo ay xiisad ka taagan tahay.

Wasiirka Amniga ee maamulka Galmudug, Axmed Macalin Fiqi ayaa arrintaas ku baahiyey bartiisa Facebook, iyo sidoo kale wareysi uu siiyey idaacadda VOA, isaga oo sheegay in lasoo banneeyey furimihii ciidamadaas ay ku aadanaayeen ee ay kula dirirayeen kooxda argagixisada ah.

Waxa uu tallaabada ciidamada looga soo dejinayo magaalada Muqdisho uu ku macneeyay “u diyaar-garowga dagaal lagu hoobto oo ka dhaca caasimada”.

Fiqi ayaa wax laga xumaado ku tilmaamay in colaad hurin la bilaabo meeshii laga sugayey meel marinta xabad joojintii uu ku baaqay ra’iisal wasaaraha xil-gaarsiinta, oo uu si weyn ugu dhaliilay tix-gelin la’aanta fariimihiisa.

Fiqi ayaa hadalka sheegay kahor inta aysan maamul goboleedyada Galmudug iyo HirShabelle iyo sidoo kale ra’iisul wasaare Rooble ka horiman muddo kororsiga, taasi oo yara qaboojisay xiisaddii ka taagneyd Muqdisho.

Madaxweyne Farmaajo ayaa isna xalay sheegay inuu baarlamanka ku laabanayo si dalka doorasho uga dhacdo ayada oo la raacayo heshiiska doorashada ee September 17, taasi oo rajo badan abuurtay oo ah in magaalada Muqdisho ay dagaal ka baaqsan karto.

Xaalada magaalada Muqdisho ayaa laga deyrinayey, tan iyo markii ay qarxeen dagaalada u dhaxeeyay dhinacyada is-haya, waxaana qeybo kamid ah ka bilowday qax, ayada oo weli ciidamada ay kala joogaan aagaggooda.

Hoos ka dhageyso wareysiga Fiqi ee VOA.

https://www.caasimada.net/wp-content/uploads/2021/04/02d8a1cc-1caf-4946-a08d-5c06b463a12d_48k.mp3

The post Fiqi oo sheegay in ciidan ku sugnaa Galmudug loo soo qaaday Xamar (Dhageyso) appeared first on Caasimada Online.