Daawo: Wasiir Xundubey: Xiisadda Muqdisho waxay gabaad siin kartaa Al-Shabaab iyo Daacish

[Deeq A.]

Muqdisho (Caasimada Online) – Wasiirka Amniga Soomaaliya Xasan Xundubey oo shir jaraa’id ku qabtay Magaalada Muqdisho ee Caasimadda Soomaaliya ayaa ka hadlay xaaladihii ugu dambeeyey ee xiisadda dagaal ee ka jirto Magaalada.

Wasiir Xundubey ayaa sheegay in ciidamada kasoo horjeedo kuwa Dowladda Soomaaliya ay yihiin ciidamo leh dhaqan **********imo kuwaas oo uu sheegay inay dhac iyo dil u geysanayan dadka Shacabka.

Wasiirka Amniga ayaa sheegay in ciidamadaan ay dadka Shacabka ah ku qasbayaan inay guryahooda ka baxaan taasoo uu ku tilmaamay inay tahay arrin aan wanaagsaneyn.

Xundubey oo la hadlayey madaxda xubnaha mucaaradka ee kasoo horjeedo muddo kordhinta uu sameystay madaxweyne Farmaajo ayaa u sheegay inaysan gabaad u noqon dad aysan hadhow maamuli karin.

“Madaxda waddo abaabulka dagaal waxaan u sheegayaa inaysan gabaad u noqon ciidamo aysan hadhow maamuli karin isla markaasna leh dhaqan **********imo taasoo dhibaato ku noqon doonta dadka Muqdisho,” ayuu yiri Wasiir Xundubey.

Sidoo kale Wasiirka ayaa sheegay in xiisadda dagaal ee ka taagan Magaalada Muqdisho ee gabaad iyo fursad siineyso kooxda Al-Shabaab oo uu ku sheegay inay yihiin kuwa mar kasta ka faa’ideysto khalalaasaha.

Ugu damneyntii Wasiir Xundubey ayaa sheegay in Dowladda Soomaaliya ay leedahay awood buuxda oo ay ku maamusho kuna qabsato guud ahaan Magaalada Muqdisho balse wuxuu sheegay inay u turayaan dadka Shacabka isla markaasna ay diidan yihiin in Bil Ramadaan lagu dhex dagaalamo xaafado ay dagan yihiin dad rayid ah.

Hadalka Wasiirka Amniga ee Xukuumadda watigeeda dhamaaday ayaa kusoo aadeyso xilli Maanta ciidamada diidan muddo kordhinta ay fariisimo cusub ka sameysteen xaafado ka tirsan Degmooyinka Hodan, Howl-wadaag iyo Warta Nabadda.

The post Daawo: Wasiir Xundubey: Xiisadda Muqdisho waxay gabaad siin kartaa Al-Shabaab iyo Daacish appeared first on Caasimada Online.