Al-shabaab oo weeraro ku qaaday Kolonyo Ciidan,saldhigyo & Xeryo Ciidamada Soomaaliya degan yihiin+Khasaaraha dhinacyada

[Deeq A.]

Al-shabaab oo weeraro ku qaaday Kolonyo Ciidan,saldhigyo & Xeryo Ciidamada Soomaaliya degan yihiin+Khasaaraha dhinacyada

 

Mas’uuliyiinta Soomaaliya ayaa sheegay in ciidamada dowladda ay iska caabiyeen weerarro ay saacadihii hore ee saaka kusoo qaadeen maleeshiyada Al-Shabaab saldhigyada ciidamada ee magaalooyinka Bariire iyo Awdheegle ee Gobolka Shabeellada Hoose.

Weerarradan ayaa la sheegay inay iskugu jireen qaraxyo iyo weerar ay gaysteen maleeshiyaadka A-lshabaab. Taliyaha ciidanka xoogga dalka Sarreeye Guuto Odawaa Yuusuf Raage ayaa u sheegay warbaahinta dowladda in ciidamada dowladda ay fashiliyeen weerarrada lagu soo qaaday Bariire iyo Awdheegle. Taliyuhu waxa uu sheegay inay khasaare badan u gaysteen maleeshiyaadka Al-Shabaab.

Al-Shabaab ayaa dhinacooda sheegatay inay ciidamo ka tirsan dawladda ku dileen weerarradaas.

Labada magaalo ayaa la sheegay inay haatan gacanta ku hayaan ciidamada dowladda.

Ilo kala duwan ayaa u sheegay VOA in maleeshiyaadka Al-Shabaab ay weerarro loo adeegsaday hoobiyayaal ku qaadeen Jannaale iyo degaanna Sabiid iyo Caanoole intii ay socdeen weerarrada Bariire iyo Awdheegle.

Dhinaca kalena, baabuur laga soo buuxiyey waxyaabaha qarxa ayaa bartilmaameedsaday gawaari kolonyo ah oo ku socday Bariire iyo Awdheegle, sida ay ilo kala duwan oo magacooda qariyey ay noo sheegeen. Weerarkan ayaa ka dhacay degaanka Lafoole.

Bartamaha Soomaaliyana, iska horimaad ayaa maanta dhexmaray ciidamada dawladda iyo maleeshiyaadka Al-Shabaab tuulooyinka lagu magacaabo Sinadhaqo iyo Labi-dulle oo koonfurta ka xiga magaalada Dhuusamareeb.

Ilaa haatan tira koob sax ah lagama hayo khasaaraha rasmiga ah ee dagaalladan.

Weerar lagu qaaday kolonyo ka tirsan militeriga Soomaaliya oo marayay duleedka Dhuusamareeb

 

Kolonyo milatariga Soomaaliya ka tirsan oo maraysay duleedka magaalada Dhuusamareeb ee xarunta maamulka Galmudug ayaa lagu qaaday weerar dhaliyay khasaare isugu jira dhimasho iyo dhaawac.

Ciidamo ka tirsan milatariga iyo xoogaga Al-Shabaab ayaa isku fara saaray deegaanka Sinadhaqo oo Koonfur uga beegan Dhuusamareeb.

Illo wareedyo ku sugan Dhuusamareeb ayaa sheegay in sarkaal sare oo ka tirsan qaybta 21-aad lagu dilay dagaalka.

Dagaalladan ayaa imanaya iyadoo madaxda dowladda federaalka iyo kuwa maamul goboleedyada uu maanta shir hordhac ah uga furmay magaalada Muqdishu. Shirkan oo fool-ka-fool ah ayay ku sugan yihiin madaxda dowladda federaalka iyo kuwa dhammaan maamul goboleedyada.

Ila wareedyo ka garab dhow shirka ayaa sheegay in shirka maanta u badnaan doono ajandaha shirarka soo socda.

 

Qaran News