Puntland Oo Walaac Ka Muujisay Markale Shirka Farmaajo Uu Ku Baaqay

[Deeq A.]

Maamulka Puntland ayaa war ka soo saaray shirka uu Markale Farmaajo ku baaqay in magaalada Muqdisho ay isugu yimaadaan madaxda dowlad gobaleedyada dalka ,DF iyo Maamulka Gobalka Benadir .

Puntland ayaa sheegtay in ay ka walaacsantahay qoraallada iyo go’aanada uu qaadanayo madaxweeynaha Waqtigiisa dhamaaday Maxamed Cabdullahi Farmaajo.

Xukuumadda Garowe ayaa waxa ay sidoo kale ku baaqday in shirka lagu qabto Garoonka Diyaaradaha magaalada Muqdisho ammaankiisana ay sugaan AMISOM iyo Beesha Caalamka.

Xafiiska Madaxtooyada Puntland ayaa qoraalka kasoo baxay lagu sheegay in loo bahan yahay in waqti lasiiyo wada hadalada u socdo Rooble iyo Musharixiinta .

Hoos Ka Akhriso Qoraalka Puntland 

Dowladda Puntland ee Soomaaliyeed waxay walaac ka muujinaysaa in Madaxweynaha muddo xileedkiisu dhammaaday Mudane Maxamed Cabdullaahi Farmaajo uu markasta soo saarayo qoraalo, qaadayana tillaabooyin carqaladeynaya dadaalada xalka loogu raadinayo caqabadaha hor taagan geeddi socodka qabsoomidda doorashada Barlamaanka iyo Madaxweynaha ee Dowladda Federaalka Soomaaliya.

Dowladda Puntland waxay u aragtaa dadaalada ay wadaan Ra’iisul Wasaare Rooble iyo Midowga Murashaxiinta kuwo u gogol xaaraya jawi ay ku qabsoomi karaan shirar looga wada hadlo qabsoomidda doorasho loo dhan yahay, heshiisna lagu yahay.

Sidoo kale, Dowladda Puntland waxay cadeynaysaa inay markasta diyaar u tahay ka qaybgalka shirarka xalka loogu raadinayo qabsoomidda doorasho heshiis lagu yahay oo ku qotonta heshiiskii 17 September 2020.

Dowladda Puntland waxay soo jeedinaysaa in shirarku ka dhacaan Garoonka diyaaradaha Magaalada Mogadishu, waxayna ka filaysaa Xafiiska Qaramada Midowbay iyo AMISOM inay diyaariyaan goobta iyo amniga shirarka. Dowladda Puntland waxay Wakiilada Beesha Caalamka uga mahad celinaysaa dadaalada joogtada ah ee ay la garab taagan yihiin Dowladda iyo Shacabka Soomaaliya.

====DHAMMAAD===

Source: goobjoog.com