Dawlada Qatar oo si adag uga hadashay dhalinyaro Soomaaliya oo si Khiyaamo ah lagu geeyay Eritrea

[Deeq A.]

Dawlada Qatar oo si adag uga hadashay dhalinyaro Soomaaliya oo si Khiyaamo ah lagu geeyay Eritrea

 

Waxaa mudooyinkii lasoo dhaafay soo baxayay warar sheegaya in dhalinyaro Soomaaliyeed oo tababar ciidanimo loo geeyay dalka Eritrea lagu qalday loona sheegay in la geenayo dalka Qatar si ay shaqo uga helaan.

War kasoo baxay dowlada Qatar ayaa lagu sheegay in dowladaha Soomaaliya iyo Eritrea ka codsatay in baaritaan lagu sameeyo in dhalinyarada Soomaaliyeed ee la geeyay dalka Eritrea lagu qiyaameeyay in la geenayo Qatar.

“Waan cambaareynaynaa shaqsi kasta oo si been abuur ah loogu sheegay inay u guurayaan Qatar si ay fursado shaqo uga helaan, Qatar waxay ka soo horjeedaa dhaqamada noocan oo kale ah waxayna ku boorrineysaa dhamaan dowladaha inay baaraan xadgudubyada noocaas ah”. ayaa lagu yiri warka kasoo baxay dowlada Qatar.

Dowlada Qatar ayaa sheegtay in marar badan dad masaakiin ah lagu qiyaameeyay in dalka Qatar shaqo loo geenayo, waxa ayna dowlada tilmaantay si taasi u dhicin dalalka ay ka yimaadaan Shaqaalaha rasmiga ah ay ka furtay Xarumo laga bixiyo dalku-galka dalkaas.

Qatar ayaa horey loogu eedeeyay in ay wax ka ogeyd qiyaanada lagu sameeyay dhalinyaro badan oo Soomaaliyeed oo markii hore loo sheegay in la geenayo dalka Qatar balse diyaaradihii qaaday ka dejiyeen dalka Eritrea laguna shubay xeryo ciidan.

Warkan kasoo baxay dowlada Qatar ayaa kusoo aadaya xili ay soo baxayeen warar ku aadan in dhalinyaro Soomaaliyeed oo lagu tababaray dalka Eritrea la galiyay dagaalka gobolka Tigrey halkaasna lagu laayay qaar badan oo kamid ah.

 

Qaran News