Akhriso: Dowladda Soomaaliya Oo Shir Deg Deg ah ku Baaqday

[Deeq A.]

Madaxweynaha Soomaaliya Maxamed Cabdullaahi Farmaajo oo goordhaw war ka soo saaray xaaladda doorashooyinka dalka ayaa ku baaqay in Shirar dib u heshiisiin ah la qabto.

war ka soo baxay Villa Soomaaliya ayaa lagu yiri Madaxweeynaha oo tixgalinaya xaaladda siyaasadeed iyo amni ee dalka iyo baahida loo qabo in la gudagalo qabsoomidda doorashadii lagu heshiiyey waxaa uu soo saaray go’aanadan:

1- Madaxweynuhu wuxuu shir iskugu yeerayaa madaxda Dowlad Goboleedyadda dalka iyo Gobolka Banaadir.

2- Shirkaas waxaa lagu qabanayaa magaalada Samareeb ee caasimadda Dowlad Goboleedka Galmudug.

3- Shirkan wadatashiga ah waxaa uu socon doonaa inta u dhaxaysa 1-da ilaa 3-da bisha Febraayo 2021.

4- Shirka wadatashiga ee Madaxweynuhu isugu yeerayo Madaxda Dowlad Goboleedyada, waxaa saldhig u ah heshiiskii 17-ka Sebteembar 2020 laga gaaray hannaanka doorashooyinka, ayna meelmariyeen Labada Aqal ee Baarlamaanka Federaalka Soomaaliya.

5- Madaxweynuhu isaga oo gudanaya waajibkiisa Dastuuriga ah wuxuu 5-ta bisha Febraayo, 2021 shir degdeg ah isugu yeerayaa xubnaha Labada Aqal ee Baarlamaanka Fedraalka Soomaaliya, si uu warbixin uga siiyo xaaladda guud ee dalka iyo gaar ahaan doorashooyinka dalka.

Warka ka soo baxay Dowladda ayaa ku soo adaya xilli maanta uu madaxweeynaha kulan la qaatay Saaxibada Caalamka.

Source: goobjoog.com