Beesha Caalamka oo dhexdhexaadinaysa dhinacyada isku yaha doorashada Soomaaliya

[Deeq A.]

Beesha Caalamka ayaa dhexdhexaadinaysa Dowladda Federaalla iyo Dowlad Goboleedyada Puntland iyo Jubaland oo isku haya arrimaha doorashooyinka.

Wakiilo ka tirsan Beesha Caalmaka ayaa maanta kulan kula qaatay hab maqal iyo muuqaal madaxweynaha Jubaland Axmed Maxamed Islaam, waxayna kala hadleen sidii xal looga gaari lahaa doorashada lagu muransan yahay iyo sidoo kale ammaanka dalka Soomaaliya oo maalmihii ugu dambeeyay soo xumaanayay.

Mas’uuliyiintu waxay isla soo qaadeen sida ay ahmiyada weyn u leedahay in wada hadal lagu dhameeyo is marin waaga ka taagan arimaha doorashooyinka taas oo loo arko in ay tahay xalka ugu haboon ee laga gudbi karo waqtigan kala guurka ah.

Kulanka waxaa ka qeyb galay Wakiilada Qaramada Midoobay iyo Midowga Yurub, iyo Safiirada dalalka Maraykanka, Ingiriiska, Sweden Itoobiya iyo Danjirayaal kale.

Dhanka kale wafdi ka socda Beesha Caalamka ayaa lagu wadaa in ay maalmaha soo socda yimaadaan magaalada Garowe ama maqal iyo muuqaalka kulan kula qaataan madaxweynaha Puntland Siciid Cabdullaahi Deni, waxayna kala hadli doonaan khilaafka ka taagan doorashooyinka Soomaaliya.

Beesha Caalamka oo bixinaysa inta badan dhaqaalaha ku baxaya doorashada ayaa doonaysa in ay Soomaaliya ka dhacdo doorasho loo dhanyahay.

Dowladda Federaalka iyo Dowlad Goboleedyada Galmudug, Hirshabeelle iyo Koonfur Galbeed ayaa dhaween sheegay in ay qaban doonaan doorasho ay ka maqan tahay Puntland iyo Jubaland.

PUNTLAND POST

The post Beesha Caalamka oo dhexdhexaadinaysa dhinacyada isku yaha doorashada Soomaaliya appeared first on Puntland Post.