Xog: Farmaajo oo daqiiqadihii ugu dambeeyay ka baaqday munaasabad lagu marti qaaday + Sababta

[Deeq A.]

Muqdisho (Caasimada Online) – Madaxweynaha Soomaaliya Maxamed Cabdullaahi Farmaajo ayaa maanta daqiiqadihii ugu dambeeyay ka baaqsaday ka qeybgalka Munaasabad loogu mahad-celinayay dadkii ka soo shaqeeyay Manhajka Waxbarashada Soomaaliya, taas oo ka dhacday Tiyaatarka Qaranka.

Ciidanka ilaalada gaarka ah ee Madaxweynaha Soomaaliya ayaa xalay lagu daadiyay xaafadaha ka agdhow Tiyaartarka Qarnka, waxayna saakay aroortii xireen inta ugu badan wadooyinka magaalada Muqdisho, hase waxaa munaasabadaas ka baaqday Madaxweyne Farmaajo.

Munaasabaddaas ayaa waxaa madaxweynaha beddelkiisa ka qeyb galay ra’iisul wasaare ku-xigeenka Mahdi Maxamed Guuleed, kaasi oo ku weeraray mar kale xubnaha mucaaradka.

Ilaa hadda si rasmi ah looma ogo sababtii uu ugu baaqday munaasabaddan, waana wax mararka qaar dhaca in madaxweynaha xilli dambe ka baaqdo munsaabadaha qaarkood sababo amni dartood.

Dhinaca kale saakay ayaa baraha Bulshada lagu baahiyay carruur saqiiro ah oo ciidanka madaxtooyada u diideen Iskuulada ku dhow dhow Tiyaatarka iyo muuqaalo laga soo duubay arday si rafaad leh lagu geeyey munaasabadda si madaxweynaha uu ula hadlo.

Inkasta oo aysan caddeyn, haddana dadka qaar ayaa aaminsan inay suurta-gal tahay in Madaxweynaha dhibsaday qoraaladii, sawiradii iyo muuqaaladii saakay laga baahiyay Ardaydii dhibaatada la kulantay intii ay socotay qaban qaabada xafladii uu ka qeyb geli lahaa iyo kuwii wadooyinka laga xirtay ee dib looga celiyay Iskuuladii ay usoo kalaheen.

Villa Somalia ma aysan faah faahin baaqashada Madaxweynaha ee Munaasabadaan.

The post Xog: Farmaajo oo daqiiqadihii ugu dambeeyay ka baaqday munaasabad lagu marti qaaday + Sababta first appeared on Caasimada Online.