Magaalada BAYDHABA oo madaafiic lagu garaacay

[Deeq A.]

Baydhaba (Caasimada Online) – Madaafiic dhowr ah ayaa saqdii dhexe ee xalay lagu garaacay Magaalada Baydhabo ee Xarunta Gobolka Baay, oo hadda xarun ku-meel gaar u ah maamulka Koonfur Galbeed Soomaaliya.

Illaa toddobo hoobiye ayaa laga maqlay magaalada iyo nawaaxigeedaba. Madaafiicda ayaana u muuqatay mid loo riday dhanka Madaxtooyada Baydhabo, oo uu degan yahay Madaxweynaha Koonfur Galbeed, Cabdicasiis Xasan Maxamed (Lafta-gareen).

Ilo dhanka amniga ayaa sheegaya in madaafiicda laga soo tuuray magaalada bannaankeeda, mana cadda in waxyeelo gaysteen.

Weerarka hoobiyaha loo adeegsaday ayaa dhacay, xili inta badan dadka reer Baydhabo ay jiifeen.

Sidoo kale caweyskii xalay ayaa magaalada lagu soo tuuray illaa toban hoobiye oo kale, lamana soo sheegin wax khasaaro ah oo ka dhashay, illaa iyo hadda inta laga warqabo.

Horaantii bishan ayay ahayd markii sidaan oo kale tiro hoobiye-yaal ah loogu weeraray magaaladaasi, iyadoo aanay cidina wax ku noqon.

The post Magaalada BAYDHABA oo madaafiic lagu garaacay first appeared on Caasimada Online.