Puntland oo guullo ka sheegatay dagaal ka dhacay gobolka Bari

[Deeq A.]

Faah faahino dheeraad ah ayaa waxaa laga helayaa howl-gal qorsheysan oo ciidamada sida gaarka ah u tababaran Puntland ay maanta ka sameeyeen gobolka Bari.

Howl-galka oo uu ka dhashay dagaal foolka fool ah ayaa wuxuu si gaar ah uga dhacay dhulka buuraleyda ah ee gobolkaas oo ay ku xoogan yihiin dagaalyahanada Al-Shabaab.

Taliyaha ciidanka sida gaarka ah u tababaran Puntland ee loo yaqaano PMPF Baari Salaad Axmed oo la hadlay mid ka mid ah warbaahinta ka howl-gasha deegaanada maamulkaasi ayaa sheegay in ciidamadu ay ka war-heleen weeraray  dagaalyahanada Al-Shabaab ku soo qaadi rabeen saldhigyada ciidanka Puntland, balse ay ka hortageen.

Sidoo kale wuxuu tilmaamay inay dileen xubno ka tirsanaa Al-Shabaab, sidoo kalena ay gacanta ku dhigeen saraakiil, dagaalamayaal kale iyo maxaabiis.

Ugu dambeyn wuxuu hoosta ka xariiqay in ciidamadu ay howl-galkaas sidoo kale ku soo furteen hub fara badan, sida uu hadalka u dhigay.

Xaaladda ayaa weli kacsan, waxaana  dhaq-dhaqaaqyo xoogan haatan laga dareemayaaa qeybo badan oo ka mid ah gobolka Bari ee maamulka Puntland.

View the full article