Kooxo qandaraasleyaal ah oo qayb ka ah howlgallada Mareykanka ee Soomaaliya

[Deeq A.]

Muqdisho (Caasimadda Online) – Shabakad laga leeyahay wadanka Russia ayaa soo daabacday in qandaraaslayaal madax banaan ay ku lug leeyahiin duqeymaha uu Mareykanka ka geysto gudaha Soomaaliya kaas oo lagu sheego in lagula dagaallamo kooxaha argagixisada.

Warbixintan xasaasiga ah ayaa waxaa soo bandhigay hay’adda OCCRP oo fadhigeedu yahay USA, isla markaana magacooda loo soo gaabiyay  Mashruuca Baahinta Dambiyada Abaabulan iyo Musuqa.

Macluumaadka lasoo bandhigay waxaa ku jirta in shirkado diyaaradeed ay heshiis la galeen waaxda difaaca Mareykanka si ay macluumaad uga soo aruuriyaan xubnaha la beegsanayo ee ku sugan gudaha Soomaaliya.

Shirkadaha baaritaanka lagu ogaaday ee qandaraaskaan ku jira waxaa ka mid ah Gulfstream, inkastoo ay jiraan qandaraaslayaal waaweyn sida L3Harris Technologies iyo AEVEX Aerospace oo dhamaantood laga leeyahay dalka Mareykanka.

Taliska ciidamada mareykanka ee qaaradda Africa waxey sheegeen in kooxahaan ay kaliya leeyahiin iney daraasadda sameeyaan, balse aysan laheyn go’aanka ugu dambeeya ee fulinta hawlgalka la sameynaayo.

Taliska AFRICOM waxey ku doodeen in lagu qanacsan yahay shaqadooda, walow warbixinta lagu sheegay in masuq-maasuq baahsan ay ka jirto sheekada.

Xogta hoose ee la baahiyay waxey sheegeysaa in horaantii sanadkaan ay kooxda Al-Shabaab weerar ku dileen hal askari iyo laba qandaraasle markii ay beegsadeen xerada Manda Bay ee mareykanka ku leeyahay waqooyiga dalka Kenya,.

Qaramada Midoobay iyo kooxaha xuquuqul insaanka ayaan ku qanacsaneyn hawlgalka ay ciidamada Mareykanka ka sameynayaan gudaha Soomaaliya maadaama ay sheegeen iney halis galinayaan dad rayid ah.

Hawlgallada taliska AFRICOM ee gudaha Soomaaliya wuxuu bilowday 2007, balse sanadba sanadka ka dambeeya wey sii kordhayeen duqeymaha dhanka cirka ah oo ay sameeyaan.