Olole Xil Ka Qaadis Oo Ka Dhan Ah Raysal Wasaaraha Soomaaliya Oo Ka Socda Xarunta Baarlamanka Soomaaliya

[Deeq A.]

(SLT-Muqdisho)-Xildhibaano ka tirsan baarlamanka Soomaaliya ayaa wada olole xooggan oo la doonayo in maanta lagu rido xukuumadda raysal wasaare Xasan Cali Kheyre, sida ay warinayaa warbaahinta maxliga ah ee magaalada Muqdisho oo warkan ay ka soo xigtay shabakadda wararka Somalilandtoday

Xildhibaanada Golaha Shacabka ee baarlamaanka Soomaaliya ayaa maanta la filayaa inay kulan xasaasi ah ku yeeshaan xaruntooda magaalada Muqdisho, kaas oo lagaga hadlayo arrimaha doorashooyinka ee 2020/2021, waxaana la isku dayayaa in isla kulankaas lagu rido xukuumadda.

Kulanka oo ah mid xasaasi ah ayaa waxaa lagu wargeliyay inay soo xaadiraan dhammaan xubnaha Golaha Shacabka ee baarlamaanka Soomaaliya, hase yeeshee ma cadda in kooramka uu buuxsami doono iyo in kale. Xildhibaanada ayaa dood adag ka yeelan doono arrimaha doorashada oo aan weli cadeyn nooceeda iyo sida loo waajahayo.

sida ay warinayaa warbaahinta maxliga ah ee magaalada Muqdisho oo warkan ay ka soo xigtay shabakadda wararka Somalilandtoday ayaa sheegaya inuu jiro guux ku saabsan mooshin ka dhan ah raysal Wasaare Kheyre oo la doonayo in maanta la hor geeno kulanka Xildhibaanada Baarlamaanka.

Mooshinkaan ayaa la sheegayaa inay dabada ka riixayaan guddoonka Baarlamaanka, waxaana laga yaabaa in kulankaan xilka lagaga qaado Ra’isul Wasaare Kheyre iyo Xukuumadiisa, hase yeeshee waxaan weli caddeyn tirada xildhibaanada taageersan mooshinka.

Waxaa sidoo kale isku daygan wax ka og madaxtooyada Soomaaliya, xilli uu kasii daray khilaafka u dhaxeeya madaxweynaha iyo ra’iisul wasaaraha.

Guddoonka golaha shacabka, gaar ahaan Mursal iyo Muudey, ayaa la sheegay in ka go’an tahay inay xaqiijiyaan muddo korodhsi, kaasi oo sidoo kale uu taageerayo madaxweyne Maxamed Cabdullaahi Farmaajo.

Xildhibaanada Baarlamaanka ayaa hadda ku qulqulayo Xarunta Baarlamaanka, waxaana la filayaa in Kheyre iyo Xukuumadiisa lagu eedeeyo inay sabab u yihiin inay doorashada ku dhici weyday waqtigeeda.

Source