Uganda oo shaacisay inay diyaarado dagaal u soo direyso Soomaaliya

[Deeq A.]

Ciiddanka Difaaca ee dalka Uganda (UPDF) waxay sheegeen inay Soomaaliya u soo diri doonaan diyaaradaha Helikop-tarada ee dagaalka, si ay taageeraan ciidankaa AMISOM.

Afhayeenka ciiddanka milatariga Uganda, Richard Karemire ayaa shaaciyey inay diyaaradahaasi loo adeegsan doono taageerida ciiddanka dhulka ee AMISOM marka ay fulinayaan howl-galladda ka dhanka ah Al-Shabaab, waa sida uu hadalka u dhigay.

Richard Karemire wax faahfaahin ah kama bixinin tirada diyaaradahaasi iyo xilliga la soo gaarsiin doono howl-galka AMISOM ee Soomaaliya.

Waa markii ugu horreysay muddo 8 sano kadib oo ay Uganda sheegto inay Soomaaliya u soo direyso diyaaradaha Helikop-tarada ee lagu dagaalamo.

Uganda waxaa Soomaaliya ka jooga illaa 6,000 oo Askari, waana ciiddanka ugu tirada badan ee qeybta ka ah howl-galka AMISOM, marka loo eego ciiddamadda kale ee ka kala socda dalalka Jabuuti, Burundi, Kenya iyo Ethiopia.

View the full article