Kulankii ugu adkaa ee madaxda DF iyo kuwa maamullada oo ka dhacay Dhuusamareeb

[Deeq A.]

Xarunta madaxtooyada Galmuudg ee magaalada Dhuusamareeb waxaa xalay iyo shalay ka dhacay kulamo u dhaxeeyey madaxda dowladda federaalka iyo madax maamul goboleedyada oo u jeedkoodu yahay in xal looga gaaro nooca doorasho ee dalka laga qabanayo.

Warar hoose oo laga helayo shirka dhusamreeb ayaa sheegaya in kulamadan ay ahaayeen kuwii rasmiga ahaa, islamarkaana shirka ka dhacaya hoolka shirarka uu yahay oo kaliya mid khudbado laga jeedin doono, kadibna lagu soo bandhigi doono waxa kulamadan ka soo baxa, islamarkaana uusan qaadan doonin wax ka badan maalin ama laba maalin.

Sababta ayaa waxa lagu  sheegay inaan la qaban karin kulanka weyn iyada oo aan heshiis la gaarin maadaama uu yahay mid dadka oo dhan iyo warbaahinta u furan, islamarkaana aan dood iyo buuq lagu muujin karin.

Wararka Idaacadda Shabelle ay ka heleyso ilo ku dhow-dhow shirka ayaa waxa ay tilmamaayaan in xalka kaliya ee muuqda, una badan tahay in shirka Dhuusamareeb lagu gaaro in  uu yahay in lagu dhiso guddi farsamo oo ka kooban wasiiro heer federal iyo heer gobol ah, oo kasoo shaqeeya haddii meel dhexe oo la isugu iman karo, kadibna madaxda ay shir kale isugu yimaadaan toddobaadyada soo socda.

Shirka ay ku ballameen madaxda dowladda iyo kuwa maamul goboledyada  ayaa lagu sheegay inuu ku qabsoomi karo laba ama saddex toddobaad gudahood, kana dhici karo magaalada Baydhabo  ama Muqdisho, inkastoo ay u badan tahay  in Muqdisho la’isugu yimaado.

View the full article